اسلام آباد (پریس ریلیز) وفاق ایوانہائے صنعت و تجارت پاکستان (ایف پی سی سی آئی) کے صدر عاطف اکرام شیخ اور یونائیٹڈ بزنس گروپ کے پیٹرن ان چیف ایس ایم تنویر نے ملک بھر کی تجارتی تنظیموں کی رکنیت کی تجدید کی ڈیڈ لائن میں تین ہفتوں کی توسیع کے فیصلے کا خیرمقدم کیا ہے۔ انہوں نے اس اہم اقدام پر ڈائریکٹر جنرل ٹریڈ آرگنائزیشنز (ڈی جی ٹی او) کا شکریہ ادا کیا ہے۔
اس سے قبل تمام تجارتی تنظیموں کے لیے رکنیت کی تجدید کی آخری تاریخ 31 مارچ 2026 مقرر تھی۔ ایف پی سی سی آئی نے ماہ رمضان کے دوران دفتری اوقات میں کمی اور عید کی تعطیلات کے باعث پیش آنے والی مشکلات کے پیش نظر ڈی جی ٹی او سے توسیع کی باضابطہ درخواست کی تھی۔
اس معاملے کو منطقی انجام تک پہنچانے کے لیے ایف پی سی سی آئی کے نائب صدر طارق جدون خان، کیپیٹل ہاؤس کے چیئرمین کریم عزیز ملک اور کوآرڈینیشن ایف پی سی سی آئی کے چیئرمین و صدر حافظ آباد چیمبر ملک سہیل حسین نے متحرک کردار ادا کیا جس کے نتیجے میں باقاعدہ نوٹیفکیشن جاری کیا گیا۔
ڈی جی ٹی او نے صورتحال کا جائزہ لینے کے بعد تجارتی تنظیموں کو رکنیت کی تجدید کے لیے مزید تین ہفتوں کی مہلت دے دی ہے جس کے بعد اب نئی آخری تاریخ 20 اپریل 2026 مقرر کی گئی ہے۔
عاطف اکرام شیخ اور ایس ایم تنویر نے ڈی جی ٹی او کی جانب سے بروقت فیصلے کو سراہتے ہوئے کہا کہ اس توسیع سے ملک بھر کے چیمبرز اور ایسوسی ایشنز کو ریلیف ملے گا اور وہ تجدید کا عمل مؤثر طریقے سے مکمل کر سکیں گے۔ صدر ایف پی سی سی آئی نے اس بات کا اعادہ کیا کہ وہ اور ان کی پوری ٹیم پاکستانی تاجر برادری کے مفادات کے تحفظ کے لیے پرعزم ہے۔
بریگیڈیئر (ر) افتخار اوپل، ایس آئی (ایم)
سیکرٹری جنرل
