وفاقی دارالحکومت اسلام آباد اور گردونواح میں گرج چمک کے ساتھ مزید بارش متوقع ہے۔ محکمہ موسمیات نے پنجاب، بلوچستان اور سندھ کے مختلف حصوں میں بھی ابر کرم برسنے کی پیش گوئی کر دی ہے۔
محکمہ موسمیات کے مطابق راولپنڈی، اٹک، چکوال، جہلم، مری اور گلیات سمیت سرگودھا اور میانوالی میں بارش کا امکان ہے۔ لاہور، گجرات، گوجرانوالہ، حافظ آباد، منڈی بہاؤالدین اور سیالکوٹ میں بھی گرج چمک کے ساتھ بارش متوقع ہے۔ اس کے علاوہ نارووال، ساہیوال، پاکپتن، اوکاڑہ اور قصور میں بھی تیز ہواؤں اور گرج چمک کے ساتھ بارش کی توقع ہے۔
بلوچستان کے حوالے سے محکمہ موسمیات کا کہنا ہے کہ کوئٹہ، زیارت، چمن، پشین، قلعہ عبداللہ اور قلعہ سیف اللہ میں بارش متوقع ہے۔ چاغی، نوشکی، ہرنائی، ژوب، قلات، مستونگ، بارکھان اور کوہلو میں بھی بادل برسیں گے۔ بولان، سبی، نصیر آباد، لورالائی، خضدار، کیچ اور پنجگور میں بارش کا امکان ہے۔ آواران، تربت اور لسبیلہ میں تیز ہواؤں کے ساتھ گرج چمک کی پیش گوئی کی گئی ہے۔
سندھ کے مختلف اضلاع جن میں کراچی، حیدرآباد، دادو، جیکب آباد، نوشہرو فیروز، کشمور اور لاڑکانہ شامل ہیں، وہاں گرج چمک کے ساتھ بارش متوقع ہے۔ سانگھڑ، سکھر، گھوٹکی، خیرپور، شہید بے نظیر آباد، ٹھٹھہ، بدین، میرپورخاص اور عمرکوٹ کے لیے بھی اسی طرح کے موسم کی پیش گوئی کی گئی ہے۔
محکمہ موسمیات نے خبردار کیا ہے کہ تھرپارکر میں تیز ہواؤں اور گرج چمک کے ساتھ موسلا دھار بارش ہو سکتی ہے، جبکہ بعض مقامات پر ژالہ باری کا بھی امکان ہے۔
موجودہ پیش گوئی کے مطابق اسلام آباد میں آج بارش جبکہ لاہور میں گرج چمک کے ساتھ بارش کا امکان ہے۔ دوسری جانب کراچی میں دن کے ابتدائی حصے میں ہونے والی بارش کے بعد موسم بتدریج صاف ہونے کی توقع ہے۔
