پاکستان کے معروف چائلڈ یوٹیوبرز محمد شیراز اور ان کی ہمشیرہ مسکان کراچی میں رمضان ٹرانسمیشن میں شرکت کے بعد اپنے آبائی گاؤں واپس پہنچ گئے ہیں۔ یہ بہن بھائی عید منانے کے لیے اپنے گاؤں پہنچے جہاں انہوں نے اپنی خوشیوں کو مقامی بچوں کے ساتھ بانٹنے کا فیصلہ کیا۔
سوشل میڈیا پر شیئر کی گئی ایک ویڈیو میں دیکھا جا سکتا ہے کہ شیراز اور مسکان کراچی سے لائی گئی عیدی مقامی بچوں میں تقسیم کر رہے ہیں۔ ان کا یہ اقدام سوشل میڈیا صارفین کی جانب سے بے حد سراہا جا رہا ہے اور لوگ ان کی شہرت کے باوجود اپنے جڑوں سے جڑے رہنے اور عاجزی کی تعریف کر رہے ہیں۔
شیراز اور مسکان کا تعلق سیاچن کے دامن میں واقع گھرسے نامی چھوٹے سے گاؤں سے ہے جس کی آبادی تقریباً دو ہزار افراد پر مشتمل ہے۔ شیراز نے اپنے وی لاگز کے ذریعے مقامی ثقافت، روایتی طرز زندگی اور خوبصورت مقامات کو دنیا کے سامنے پیش کیا، جس سے انہیں عالمی سطح پر پذیرائی ملی۔ ان کے والد محمد تقی کا کہنا ہے کہ ان کا مقصد مثبت چیزوں کو اجاگر کرنا اور لوگوں تک اچھے پیغام پہنچانا ہے۔
اس سے قبل بھی یہ بہن بھائی اپنی کمائی سے گاؤں کے سکول کی تعمیر نو جیسے فلاحی کاموں میں مصروف رہے ہیں۔ سوشل میڈیا صارفین کا کہنا ہے کہ شہرت کی بلندیوں پر ہونے کے باوجود اپنے علاقے کے بچوں کے ساتھ خوشیاں بانٹنا ان کے اعلیٰ اخلاق اور زمین سے جڑے رہنے کا منہ بولتا ثبوت ہے۔
