فیصل آباد میں پریس کانفرنس سے خطاب کرتے ہوئے مسلم لیگ ن کے سینئر رہنما اور سینیٹر عابد شیر علی نے کہا ہے کہ ملک میں انتشار پھیلانے کا ایجنڈا رکھنے والوں کے لیے واضح پیغام ہے کہ حکومت اب مزید برداشت کا مظاہرہ نہیں کرے گی۔
عابد شیر علی کا کہنا تھا کہ ایران کے حالیہ معاملے میں پاکستان کے کردار کو عالمی سطح پر سراہا جا رہا ہے۔ انہوں نے اس سفارتی کامیابی کا سہرا آرمی چیف جنرل سید عاصم منیر اور وفاقی حکومت کے سر باندھا۔
سینیٹر عابد شیر علی نے کہا کہ ایک وقت تھا جب پاکستان کو دہشت گردی سے جوڑا جاتا تھا مگر آج ہمارا ملک ایک ثالث کا کردار ادا کر رہا ہے۔ انہوں نے مزید کہا کہ ملک کو عدم استحکام سے دوچار کرنے والے عناصر کی کوششیں ناکام ہوں گی۔
مسلم لیگ ن کے رہنما نے الزام عائد کیا کہ عارف اجاکیہ ایک بھارتی ایجنٹ ہے جس سے بانی پی ٹی آئی کے بیٹوں کی ملاقات ذلفی بخاری کی مدد سے کرائی گئی۔ انہوں نے کہا کہ یہ وہی لوگ ہیں جو پاکستان کو سری لنکا بنانے کی باتیں کرتے تھے۔
عابد شیر علی نے اپنے بیان میں مزید کہا کہ پاکستان آج معاشی اور سیاسی استحکام کی جانب گامزن ہے اور اس سفر میں موجودہ سیاسی اور عسکری قیادت کا کردار کلیدی حیثیت رکھتا ہے۔
