بلوچستان کے ضلع ژوب اور گردونواح میں جمعرات کی شب زلزلے کے شدید جھٹکے محسوس کیے گئے۔ ریکٹر اسکیل پر زلزلے کی شدت 4.2 ریکارڈ کی گئی۔
زلزلے کے جھٹکے محسوس ہوتے ہی شہریوں میں خوف و ہراس پھیل گیا اور لوگ کلمہ طیبہ کا ورد کرتے ہوئے گھروں سے باہر نکل آئے۔ ابتدائی اطلاعات کے مطابق زلزلے سے کسی بھی قسم کے جانی یا مالی نقصان کی اطلاع موصول نہیں ہوئی۔
نیشنل سیسمک مانیٹرنگ سینٹر اسلام آباد کے مطابق زلزلے کا مرکز ژوب سے 110 کلومیٹر جنوب مشرق میں واقع تھا جبکہ اس کی گہرائی 12 کلومیٹر تھی۔
مقامی انتظامیہ اور امدادی ادارے صورتحال پر کڑی نظر رکھے ہوئے ہیں اور علاقے میں الرٹ جاری کر دیا گیا ہے۔
