نائب وزیراعظم اور وزیر خارجہ اسحاق ڈار نے مصر کے وزیر خارجہ ڈاکٹر بدر عبدالعاطی کے ساتھ ٹیلی فونک رابطہ کیا جس میں خطے کی بدلتی ہوئی صورتحال پر تفصیلی تبادلہ خیال کیا گیا۔
دفتر خارجہ کے ترجمان کے مطابق دونوں رہنماؤں نے خطے میں امن اور استحکام کے فروغ کے لیے باہمی تعاون، صبر اور مذاکرات کی اہمیت پر زور دیا۔ اس موقع پر پاکستان اور مصر نے خطے میں امن و خوشحالی کے لیے جاری کوششوں کی حمایت کے عزم کا اعادہ کیا اور مستقبل میں بھی رابطے برقرار رکھنے پر اتفاق کیا۔
علاوہ ازیں وزیر خارجہ اسحاق ڈار نے چین کے وزیر خارجہ وانگ ژی سے بھی ٹیلی فون پر گفتگو کی۔ اس رابطے کے دوران دونوں ممالک نے مشرق وسطیٰ میں امن و استحکام کی بحالی کے لیے مشترکہ عزم کا اظہار کیا۔
پاکستانی اور چینی وزرائے خارجہ نے اس بات پر اتفاق کیا کہ خطے میں جاری تنازعات کو کم کرنے کے لیے فوری سفارتی کوششوں کی ضرورت ہے۔ دونوں رہنماؤں نے ایران سے متعلق جاری تنازع سمیت خطے کی تیزی سے بدلتی ہوئی صورتحال پر بھی غور و خوض کیا۔
