صدر مملکت آصف علی زرداری اور وزیراعظم شہباز شریف کے درمیان اسلام آباد میں ایک اہم ملاقات ہوئی جس میں ملک کی قومی سلامتی، معاشی صورتحال اور خطے میں جاری کشیدگی کے تناظر میں درپیش چیلنجز کا تفصیلی جائزہ لیا گیا۔
اس اعلیٰ سطحی اجلاس میں نائب وزیراعظم و وزیر خارجہ اسحاق ڈار، چیئرمین پاکستان پیپلز پارٹی بلاول بھٹو زرداری، وزیر داخلہ محسن نقوی اور نیشنل سیکیورٹی ایڈوائزر و ڈی جی آئی ایس آئی لیفٹیننٹ جنرل عاصم ملک شریک ہوئے۔ اجلاس کے دوران مشرق وسطیٰ کی بدلتی ہوئی صورتحال، بالخصوص ایران اور جاری تنازع کے پاکستان پر اثرات پر غور کیا گیا۔
ایوانِ صدر کے اعلامیے کے مطابق قیادت نے ملکی معاشی استحکام اور توانائی کی ترسیل پر پڑنے والے اثرات کا جائزہ لیا۔ شرکاء نے اس بات پر زور دیا کہ موجودہ بحرانی کیفیت سے نمٹنے کے لیے ریاستی اداروں کے مابین ہم آہنگی کو مزید مستحکم کیا جائے اور ایک مربوط قومی حکمت عملی تشکیل دی جائے۔
یہ پیشرفت پاکستان کی جانب سے خطے میں ثالثی کے کردار کو اجاگر کرنے کے بعد سامنے آئی ہے۔ ایک روز قبل اسلام آباد میں پاکستان، سعودی عرب، ترکی اور مصر کے وزرائے خارجہ کی کثیر الجہتی کانفرنس منعقد ہوئی تھی جس کا مقصد مشرق وسطیٰ میں کشیدگی کو کم کرنا تھا۔ اس دوران سعودی وزیر خارجہ شہزادہ فیصل بن فرحان، ترکی کے ہاکان فیدان اور مصر کے بدر عبدالعاطی نے وزیراعظم سے علیحدہ ملاقاتیں بھی کیں۔
پاکستان گزشتہ کچھ عرصے سے ایران اور امریکہ کے مینو درمیان رابطے کا ذریعہ بنا ہوا ہے تاکہ تنازع کے پھیلاؤ کو روکا جا سکے۔ اٹھائیس فروری سے جاری اس جنگ نے عالمی توانائی کی منڈیوں کو متاثر کیا ہے جس کے نتیجے میں پاکستان جیسے درآمدی توانائی پر انحصار کرنے والے ممالک کی مشکلات میں اضافہ ہوا ہے۔
اسی سلسلے میں نائب وزیراعظم اسحاق ڈار اکتیس مارچ کو چین کا دورہ کریں گے جہاں وہ علاقائی پیشرفت اور دوطرفہ امور پر بات چیت کریں گے۔ اس سے قبل صدر زرداری اور وزیراعظم شہباز شریف کی زیر صدارت آرمی چیف فیلڈ مارشل عاصم منیر کی موجودگی میں ہونے والے اجلاس میں بھی ایندھن کی بچت اور عوامی ریلیف کے اقدامات پر غور کیا گیا تھا۔
