وزیراعظم شہباز شریف نے ملک بھر میں پیٹرولیم مصنوعات کی اسمگلنگ اور ذخیرہ اندوزی کے خلاف سخت کارروائی کا حکم دے دیا ہے۔ وزیراعظم نے یہ ہدایات منگل کے روز ایندھن کی سپلائی چین اور کفایت شعاری کے اقدامات کا جائزہ لینے کے لیے منعقدہ ایک اعلیٰ سطحی اجلاس کی صدارت کرتے ہوئے جاری کیں۔
وزیراعظم آفس سے جاری اعلامیے کے مطابق اجلاس میں ملکی صورتحال کے پیش نظر ایندھن کی فراہمی، بچت کی حکمت عملی اور کم آمدنی والے طبقے کو ریلیف دینے کے امور پر تفصیلی غور کیا گیا۔ وزیراعظم نے متعلقہ وزارتوں کو ہدایت کی کہ صوبوں کے ساتھ مشاورت کے بعد سپلائی چین کو بہتر بنانے اور عوام کو مسلسل ریلیف فراہم کرنے کے لیے حتمی تجاویز تیار کی جائیں۔
وزیراعظم شہباز شریف نے واضح کیا کہ مارکیٹ میں استحکام لانے اور صارفین کے مفادات کے تحفظ کے لیے اسمگلروں اور ذخیرہ اندوزوں کے خلاف بلاامتیاز کارروائی عمل میں لائی جائے۔ انہوں نے کہا کہ حکومت نے گزشتہ تین ہفتوں کے دوران کمزور طبقات کو معاشی دباؤ سے بچانے کے لیے اہم اقدامات کیے ہیں اور یہ سلسلہ جاری رہے گا۔
وزیراعظم نے بتایا کہ ترقیاتی بجٹ میں کٹوتی اور کفایت شعاری کے اقدامات کے نتیجے میں حکومت 129 ارب روپے کا ریلیف فراہم کرنے میں کامیاب ہوئی ہے، جس کی بدولت پیٹرولیم مصنوعات کی قیمتوں میں اضافے کو روکا گیا۔ انہوں نے مزید کہا کہ بروقت فیصلوں کے باعث ملک میں پیٹرولیم مصنوعات کی وافر مقدار دستیاب ہے جو ملکی ضروریات پوری کرنے کے لیے کافی ہے۔
اجلاس کو بریفنگ دیتے ہوئے حکام نے بتایا کہ پیٹرولیم مصنوعات کی طلب اور رسد کی نگرانی کے لیے ڈیجیٹل ڈیش بورڈ کا نظام فعال ہے جس سے شفافیت کو یقینی بنایا جا رہا ہے اور ملک بھر میں سپلائی کا عمل بلا تعطل جاری ہے۔
اجلاس میں احد چیمہ، عطا اللہ تارڑ، علی پرویز ملک، شازہ فاطمہ خواجہ، سردار اویس احمد خان لغاری، مشیر محمد علی، وزیر مملکت بلال اظہر کیانی، معاون خصوصی طارق باجوہ اور دیگر اعلیٰ حکام نے شرکت کی۔
