حکومت سندھ نے صوبے میں جدید اور ماحول دوست ٹرانسپورٹ کے فروغ کے لیے الیکٹرک ٹیکسی سروس متعارف کرانے کا فیصلہ کیا ہے، جس کا باضابطہ معاہدہ طے پا گیا ہے۔
صوبائی وزیر شرجیل انعام میمن نے سندھ بینک، سندھ ڈویلپمنٹ فنڈ اور سندھ ماس ٹرانزٹ اتھارٹی کے اشتراک سے اس اہم منصوبے کے معاہدے پر دستخط کیے۔ اس اقدام کا بنیادی مقصد صوبے بھر میں ماحول دوست سواری کو فروغ دینا اور شہریوں کو سفر کی جدید سہولیات فراہم کرنا ہے۔
منصوبے کے تحت شروع کی جانے والی الیکٹرک ٹیکسی سروس سے جہاں شہری نقل و حمل کے نظام میں بہتری آئے گی، وہیں صوبے کے نوجوانوں کے لیے روزگار کے نئے مواقع بھی پیدا ہوں گے۔
تقریب سے خطاب کرتے ہوئے شرجیل انعام میمن نے کہا کہ صوبائی حکومت نوجوانوں سے کیے گئے وعدوں کی تکمیل کر رہی ہے اور انہیں باعزت روزگار کی فراہمی کے لیے پرعزم ہے۔
انہوں نے مزید کہا کہ سندھ میں شروع کیے گئے ٹرانسپورٹ کے مختلف منصوبوں نے عالمی سطح پر توجہ حاصل کی ہے۔ ان میں خواتین کے لیے پنک بس سروس اور الیکٹرک بسوں کا اجرا ایسے منفرد اقدامات ہیں جنہیں بین الاقوامی سطح پر سراہا جا رہا ہے۔
