قومی گندم نگران کمیٹی کا اجلاس بدھ کے روز منعقد ہوا جس میں گندم کی خریداری کے انتظامات، صوبوں کے مابین ہم آہنگی اور عالمی سطح پر غیر یقینی صورتحال کے پیش نظر ملکی غذائی تحفظ کو مستحکم بنانے کی حکمت عملی کا جائزہ لیا گیا۔
وزارت برائے قومی غذائی تحفظ و تحقیق کی جانب سے جاری کردہ اعلامیے کے مطابق اجلاس کی صدارت وفاقی وزیر رانا تنویر حسین نے کی۔
اجلاس میں ملک بھر میں جاری گندم کی خریداری کے عمل کا تفصیلی جائزہ لیا گیا جس کا مرکزی نقطہ خریداری کے نظام کی تیاری، کٹائی کے موسم کے دوران منڈیوں میں بلا تعطل سرگرمیاں اور نچلی سطح پر کسانوں کی مؤثر معاونت کو یقینی بنانا تھا۔
صوبائی نمائندوں نے کمیٹی کو خریداری کے لیے کی گئی تیاریوں اور کسانوں کی سہولت کے لیے جاری اقدامات پر بریفنگ دی۔ وفاقی وزیر رانا تنویر حسین نے صوبائی حکام کے باہمی تعاون کو سراہتے ہوئے اس عزم کا اعادہ کیا کہ وفاقی حکومت گندم کی خریداری کے عمل کو مستحکم بنانے کے لیے ہر ممکن تکنیکی اور پالیسی سطح پر معاونت فراہم کرے گی۔
