قومی اسمبلی کا اجلاس آج بروز جمعرات شام پانچ بجے پارلیمنٹ ہاؤس اسلام آباد میں دوبارہ شروع ہوگا۔ اجلاس کی صدارت اسپیکر قومی اسمبلی ایاز صادق کریں گے۔
قومی اسمبلی سیکریٹریٹ کی جانب سے اجلاس کا 18 نکاتی ایجنڈا جاری کر دیا گیا ہے۔ ایجنڈے کے مطابق اجلاس میں وقفہ سوالات، توجہ دلاؤ نوٹس اور اہم قانون سازی کا عمل شامل ہوگا۔
ایوان میں اسلام آباد کے تعلیمی اداروں میں فیسوں میں اضافے سے متعلق توجہ دلاؤ نوٹس پیش کیا جائے گا۔ اس کے علاوہ کیریج بائی ایئر ترمیمی بل 2026 اور نیشنل فنڈ فار کلچر ہیریٹیج ترمیمی بل 2026 ایوان میں زیر غور آئیں گے۔
نیشنل انسٹی ٹیوٹ آف فوک اینڈ ٹریڈیشنل ہیریٹیج یعنی لوک ورثہ ترمیمی بل 2026 منظوری کے لیے پیش کیا جائے گا۔ اجلاس میں مختلف قائمہ کمیٹیوں کی ششماہی رپورٹس بھی ایوان میں پیش کی جائیں گی۔
ایوان کی جانب سے صدر مملکت کے دو مارچ 2026 کو پارلیمنٹ کے مشترکہ اجلاس سے کیے گئے خطاب پر اظہار تشکر بھی کیا جائے گا۔
ایجنڈے میں رواں مالی سال کے پہلے آٹھ ماہ کے دوران ٹیکس محصولات میں کمی سے متعلق توجہ دلاؤ نوٹس، اعتراضات کے نکات اور دیگر پارلیمانی امور بھی شامل ہیں۔
