اسلام آباد میں پاکستان اور چین کے درمیان قونصلر امور پر مشاورت کا دسواں دور منعقد ہوا جس میں دونوں ممالک نے باہمی تعاون کو مزید مستحکم کرنے پر اتفاق کیا ہے۔ اس اہم اجلاس کا بنیادی مقصد دونوں ممالک کے شہریوں کو سہولیات کی فراہمی اور ان کے تحفظ کو یقینی بنانا تھا۔
دفتر خارجہ کے ترجمان کے مطابق پاکستانی وفد کی قیادت ڈائریکٹر جنرل چائنہ طارق وزیر نے کی جبکہ چینی وفد کی سربراہی مسٹر لانگ ژاؤ نے کی۔ دونوں وفود نے قونصلر امور کے تمام پہلوؤں کا تفصیلی جائزہ لیا اور پاک چین عوامی رابطوں کے فروغ پر اطمینان کا اظہار کیا۔
مذاکرات کے دوران ویزا پالیسیوں اور امیگریشن کے معاملات پر خصوصی توجہ مرکوز کی گئی۔ دونوں فریقین نے اس عزم کا اعادہ کیا کہ قونصلر تعاون کو مزید بڑھایا جائے گا تاکہ دونوں ممالک کے شہریوں کی فلاح و بہبود اور تحفظ کے لیے اقدامات کو مزید مربوط بنایا جا سکے۔
