لاہور (نمائندہ خصوصی) پیٹرولیم مصنوعات کی قیمتوں میں حالیہ کمی نواز شریف کی مداخلت کے بعد ممکن ہوئی جس کا مقصد مہنگائی کی چکی میں پسے عوام کو فوری ریلیف فراہم کرنا ہے۔
ذرائع کے مطابق نواز شریف اور وزیراعظم محمد شہباز شریف کے مابین تفصیلی مشاورت ہوئی جس میں ملکی معاشی صورتحال اور عوام کو درپیش مشکلات پر غور کیا گیا۔ اس ملاقات کا مرکزی نقطہ مہنگائی کے دباؤ کو کم کرنے کے لیے ہنگامی اقدامات کا تعین تھا۔
باخبر ذرائع کا کہنا ہے کہ نواز شریف نے پیٹرول کی قیمتوں میں فوری کمی کی ہدایت کی تاکہ عوام پر پڑنے والے مہنگائی کے بوجھ کو کم کیا جا سکے۔ ان ہدایات کی روشنی میں وزیراعظم نے بغیر کسی تاخیر کے ایندھن کی قیمتوں میں تخفیف کا فیصلہ کیا۔
ذرائع نے مزید بتایا کہ نواز شریف نے حکومتی سطح پر کفایت شعاری کے پروگرام پر مکمل عملدرآمد پر بھی زور دیا ہے۔ توقع کی جا رہی ہے کہ آنے والے دنوں میں مہنگائی کے اثرات کو کم کرنے کے لیے مزید ریلیف پیکیج کا اعلان کیا جائے گا۔
