پاکستان سمیت دنیا بھر میں مسیحی برادری آج اتوار کو ایسٹر کا تہوار مذہبی عقیدت و احترام کے ساتھ منا رہی ہے۔ اس موقع پر ملک بھر کے گرجا گھروں میں خصوصی عبادات کا اہتمام کیا گیا ہے جس میں مسیحی برادری نے جوش و خروش سے شرکت کی۔
صدر مملکت آصف علی زرداری اور وزیراعظم شہباز شریف نے مسیحی برادری کو ایسٹر کے موقع پر مبارکباد پیش کی ہے۔ صدر آصف علی زرداری نے اپنے پیغام میں کہا کہ ایسٹر ہمدردی، امید، تجدید اور برائی پر اچھائی کی فتح کا طاقتور پیغام دیتا ہے۔ انہوں نے تعلیم، صحت، سرکاری اداروں اور مسلح افواج میں مسیحی برادری کی گراں قدر خدمات کو سراہتے ہوئے انہیں معاشرے کا قابل احترام اور اہم حصہ قرار دیا۔
وزیراعظم شہباز شریف نے اپنی نیک خواہشات کا اظہار کرتے ہوئے کہا کہ امید ہے کہ یہ پرمسرت موقع مسیحی برادری، ملک اور پوری دنیا کے لیے امن، استحکام اور خوشحالی لائے گا۔ انہوں نے زور دیا کہ موجودہ عالمی چیلنجز کے تناظر میں تمام مذاہب کی جانب سے امن کے فروغ کی تعلیمات کی اہمیت مزید بڑھ گئی ہے۔
وزیراعظم نے اس عزم کا اعادہ کیا کہ وفاقی حکومت تمام شہریوں بشمول اقلیتوں کے مذہبی، معاشی اور تعلیمی حقوق کا تحفظ اپنی اولین ترجیح سمجھتی ہے۔
