وزیراعلیٰ پنجاب مریم نواز شریف نے لاہور میں نواز شریف انسٹی ٹیوٹ آف کینسر ٹریٹمنٹ اینڈ ریسرچ کی تعمیر کے کام کو تیز کرنے کے لیے اسے تین شفٹوں میں مکمل کرنے کی سخت ہدایات جاری کر دی ہیں۔ ان کا مقصد اس طبی سہولت کو جلد از جلد فعال بنانا ہے تاکہ مریضوں کو علاج کی جدید سہولیات میسر آ سکیں۔
اپنے دورے کے دوران وزیراعلیٰ نے ہسپتال کے مختلف شعبوں کا تفصیلی معائنہ کیا۔ انہوں نے مین انٹرنس ہال، ریڈیولاجی سیکشن، میموگرافی سوئیٹ اور سی ٹی اسکین روم کا جائزہ لیا۔ اس کے علاوہ انہوں نے ریڈیو تھراپی یونٹ، ٹریٹمنٹ پلاننگ روم، سیمولیٹر اور سیمینار روم کا بھی معائنہ کیا اور مریضوں کی سہولت کے لیے نصب جدید آلات اور اے ایچ یو روم کی کارکردگی کو پرکھا۔
مریم نواز شریف نے ہسپتال کے کلیدی عہدوں پر اعلیٰ تعلیم یافتہ اور ماہر پروفیشنلز کی تعیناتی پر زور دیا۔ انہوں نے واضح کیا کہ ہسپتال کے ڈین، ڈائریکٹر اور دیگر اہم اسامیوں پر بہترین پیشہ ور افراد کو تعینات کیا جائے۔
وزیراعلیٰ کا کہنا تھا کہ تعمیراتی کام کی رفتار بڑھانے کے لیے تین شفٹوں میں کام جاری رکھا جائے گا۔ انہوں نے اس عزم کا اعادہ کیا کہ ہسپتال میں جدید ترین اقدامات متعارف کرائے جائیں گے تاکہ مریضوں کو علاج کے بہترین معیارات فراہم کیے جا سکیں اور ہر مریض کو طبی سہولیات کی بلاتعطل فراہمی ممکن بنائی جا سکے۔
