ایرانی صدر مسعود پزشکیان نے وزیر اعظم شہباز شریف سے ٹیلی فونک گفتگو کے دوران تصدیق کی ہے کہ ایران رواں ہفتے اسلام آباد میں ہونے والے مذاکرات میں شرکت کرے گا۔
وزیراعظم آفس سے جاری بیان کے مطابق دونوں رہنماؤں کے درمیان 45 منٹ سے زائد وقت تک جاری رہنے والی یہ گفتگو انتہائی خوشگوار ماحول میں ہوئی۔ وزیراعظم شہباز شریف نے جنگ بندی پر اتفاق اور مذاکرات کی میزبانی کی پیشکش قبول کرنے پر ایرانی قیادت کی بصیرت اور دانشمندی کو سراہا۔
وزیراعظم نے گفتگو کے دوران رہبرِ معظم آیت اللہ خامنہ ای کے لیے اپنے نیک جذبات اور احترام کا اظہار بھی کیا۔
ایرانی صدر مسعود پزشکیان نے ایران اور امریکہ کے درمیان عارضی جنگ بندی کے لیے پاکستانی قیادت کی کوششوں کو سراہتے ہوئے وزیراعظم کا شکریہ ادا کیا اور پاکستانی عوام کے لیے نیک خواہشات کا اظہار کیا۔
دونوں رہنماؤں نے مستقبل میں بھی قریبی رابطے برقرار رکھنے پر اتفاق کیا۔
بعد ازاں سماجی رابطے کی ویب سائٹ ایکس پر اپنے پیغام میں وزیراعظم شہباز شریف نے کہا کہ صدر پزشکیان نے مذاکرات میں ایران کی شرکت کی توثیق کی ہے۔ وزیراعظم نے مزید کہا کہ پاکستان خطے اور اس سے باہر امن و استحکام کے فروغ کے لیے اپنے تمام دوستوں اور شراکت داروں کے ساتھ مل کر کام کرنے کے عزم پر کاربند ہے۔
