اسلام آباد میں وزیراعظم شہباز شریف نے تنازعہ والے علاقوں میں جنگ بندی کی خلاف ورزیوں پر شدید تشویش کا اظہار کیا ہے۔ وزیراعظم نے تمام فریقین پر زور دیا ہے کہ وہ امن عمل کی روح کو برقرار رکھنے کے لیے ضبط و تحمل کا مظاہرہ کریں۔
سماجی رابطے کی ویب سائٹ ایکس پر اپنے پیغام میں وزیراعظم شہباز شریف نے کہا کہ جنگ بندی کے معاہدے کی خلاف ورزیاں امن کوششوں کو نقصان پہنچا رہی ہیں۔ انہوں نے فریقین سے اپیل کی کہ طے شدہ معاہدے کے مطابق دو ہفتوں تک جنگ بندی کا احترام کیا جائے تاکہ سفارتی کوششوں کو تنازعہ کے پرامن حل کے لیے موقع مل سکے۔
اس سے قبل وزیراعظم نے امریکی صدر ڈونلڈ ٹرمپ سے درخواست کی تھی کہ وہ ایران کے ساتھ معاہدے کی ڈیڈ لائن میں دو ہفتوں کی توسیع کریں اور اس دوران ایران کو آبنائے ہرمز کھولنے پر آمادہ کریں۔ وزیراعظم کا موقف تھا کہ جاری سفارتی کوششیں امید افزا ہیں اور انہیں منطقی انجام تک پہنچنا چاہیے۔
امریکی صدر ڈونلڈ ٹرمپ نے منگل کی شب پاکستان کی جانب سے پیش کردہ دو ہفتوں کی جنگ بندی کی تجویز کو قبول کرنے کا اعلان کیا تھا۔ پاکستان کی اس سفارتی کامیابی کے تحت ٹرمپ نے ایران پر بڑے حملے کی دھمکی کو مؤخر کر دیا ہے جبکہ اس کے بدلے میں ایران نے دو ہفتوں کے لیے آبنائے ہرمز کو کھلا رکھنے کا عزم ظاہر کیا ہے۔
