اسلام آباد (ویب ڈیسک) حکومت پاکستان نے پیٹرولیم مصنوعات کے ذخیرہ کرنے کی صلاحیت کو وسیع کرنے کا فیصلہ کیا ہے، جس کے تحت گوادر میں ایک بڑے آئل ریفائنری منصوبے کے لیے سعودی عرب کی جانب سے دس ارب ڈالر کی سرمایہ کاری متوقع ہے۔
وزارت پیٹرولیم کے ذرائع کے مطابق اس منصوبے پر سعودی آرامکو اور پاکستانی کمپنیوں کے درمیان شراکت داری ہوگی۔ مجوزہ سرمایہ کاری میں ساٹھ فیصد حصہ سعودی عرب جبکہ چالیس فیصد مقامی کمپنیوں کا ہوگا۔
اس اہم منصوبے میں پاکستان اسٹیٹ آئل، آئل اینڈ گیس ڈویلپمنٹ کمپنی لمیٹڈ، پاکستان پیٹرولیم لمیٹڈ اور گورنمنٹ ہولڈنگز پرائیویٹ لمیٹڈ شامل ہوں گی۔ ریفائنری کی یومیہ پیداواری صلاحیت چار لاکھ بیرل تک ہوگی۔
غیر ملکی سرمایہ کاری کو یقینی بنانے اور توانائی کے شعبے کو مستحکم کرنے کے لیے حکومت اس منصوبے پر کام کرنے والی مشینری کی درآمد پر بیس سالہ ٹیکس چھوٹ دینے کی تجویز پر غور کر رہی ہے۔
