بورڈ آف سیکنڈری ایجوکیشن کراچی نے نویں اور دسویں جماعت کے امتحانات کے دوران طالبات کے لیے واضح ہدایات جاری کر دی ہیں۔ چیئرمین میٹرک بورڈ کے مطابق امتحانی مراکز میں کسی بھی طالبہ کو نقاب اتارنے پر مجبور نہیں کیا جائے گا۔
یہ فیصلہ طالبات کی جانب سے تلاشی کے نامناسب طریقہ کار پر سامنے آنے والی شکایات کے بعد کیا گیا ہے۔ والدین کی جانب سے اٹھائے گئے تحفظات کے پیش نظر بورڈ نے طالبات کے وقار اور پردے کے تقدس کو یقینی بنانے کا فیصلہ کیا ہے۔
نئی ہدایات کے تحت تمام امتحانی مراکز میں طالبات کی تلاشی صرف خواتین عملے کے ذریعے لی جائے گی۔ یہ عمل انتہائی باوقار اور مہذب انداز میں مکمل کیا جائے گا تاکہ طالبات کو کسی قسم کی ذہنی کوفت کا سامنا نہ کرنا پڑے۔
چیئرمین میٹرک بورڈ کا کہنا ہے کہ ان اقدامات کا مقصد جہاں ایک جانب طالبات کی مذہبی حساسیت اور وقار کا تحفظ کرنا ہے، وہیں دوسری جانب امتحانی عمل میں شفافیت کو برقرار رکھنا اور نقل کی روک تھام کو یقینی بنانا بھی ہے۔
