الیکشن کمیشن گلگت بلتستان نے خطے میں عام انتخابات کے انعقاد کا شیڈول جاری کر دیا ہے۔ انتخابی عمل کے مطابق پولنگ سات جون دو ہزار چھبیس کو ہوگی۔
چیف الیکشن کمشنر راجہ شہباز خان نے گلگت میں باضابطہ نوٹیفکیشن جاری کرتے ہوئے انتخابی شیڈول کا اعلان کیا۔ شیڈول کے تحت کاغذات نامزدگی سولہ اپریل سے بیس اپریل تک جمع کرائے جا سکیں گے جبکہ امیدواروں کی ابتدائی فہرست اکیس اپریل کو جاری کی جائے گی۔
کاغذات نامزدگی کی جانچ پڑتال کا عمل اٹھائیس اپریل تک مکمل کیا جائے گا۔ اپیلوں پر فیصلوں کا حتمی مرحلہ نو مئی تک نمٹایا جائے گا جبکہ امیدوار گیارہ مئی تک اپنے کاغذات واپس لینے کے مجاز ہوں گے۔
امیدواروں کی حتمی فہرست کی اشاعت اور انتخابی نشانات کی الاٹمنٹ بارہ مئی کو کی جائے گی۔
میڈیا سے گفتگو کرتے ہوئے چیف الیکشن کمشنر نے کہا کہ انتخابات کو شفاف، غیر جانبدارانہ اور پرامن بنانے کے لیے تمام تر انتظامات کو حتمی شکل دے دی گئی ہے۔ انہوں نے مزید کہا کہ ووٹرز کو حق رائے دہی کے استعمال کے لیے ہر ممکن سہولیات فراہم کی جائیں گی اور متعلقہ ادارے پرامن پولنگ کے عمل کو یقینی بنانے کے لیے باہمی تعاون سے کام کریں گے۔
