عالمی یومِ آب کے موقع پر پاکستان پیپلز پارٹی کے چیئرمین بلاول بھٹو زرداری نے آبی وسائل کے تحفظ کے لیے ہنگامی بنیادوں پر مشترکہ اقدامات کرنے پر زور دیا ہے۔
بلاول بھٹو زرداری نے پانی کو کرہ ارض کی حیات قرار دیتے ہوئے کہا کہ یہ انسانی تہذیب اور ماحولیاتی نظام کی بقا کے لیے ناگزیر ہے۔ انہوں نے اس عزم کا اظہار کیا کہ پانی کا تحفظ نہ صرف ماحولیاتی ضرورت ہے بلکہ یہ آنے والی نسلوں کے لیے ہماری اخلاقی ذمہ داری بھی ہے۔
ان کا کہنا تھا کہ معاشرے کے تمام طبقات کو پائیدار طریقہ کار اپنانا ہوگا تاکہ ہر شہری کو صاف پانی کی منصفانہ اور مساوی فراہمی کو یقینی بنایا جا سکے۔
بھارتی جارحیت پر تنقید کرتے ہوئے بلاول بھٹو زرداری نے کہا کہ سندھ طاس معاہدے کے حوالے سے بھارت کا یکطرفہ رویہ بین الاقوامی قوانین کی خلاف ورزی اور خطے کے استحکام کے لیے خطرہ ہے۔ انہوں نے خبردار کیا کہ معاہدے کو کمزور کرنے یا اسے معطل کرنے کی کوئی بھی کوشش ناقابل قبول ہے۔
پیپلز پارٹی کے چیئرمین نے دریائی پانی کے قدرتی بہاؤ کو روکنے اور بالائی علاقوں میں ڈیموں کی تعمیر کو پانی کو ہتھیار کے طور پر استعمال کرنے کے مترادف قرار دیا۔ انہوں نے اسے غیر ذمہ دارانہ فعل قرار دیتے ہوئے عالمی برادری سے مطالبہ کیا کہ وہ اس صورتحال کا فوری نوٹس لے۔
انہوں نے امید ظاہر کی کہ عالمی یومِ آب دنیا بھر میں باہمی تعاون، مذاکرات اور ایک پرامن و پائیدار مستقبل کے عزم کو مزید مستحکم کرے گا۔
