کراچی کے مصروف ترین کاروباری مرکز ایم اے جناح روڈ پر واقع مخدوش گل پلازہ کے تہہ خانے میں اتوار کے روز اچانک آگ بھڑک اٹھی۔ ریسکیو 1122 کے ترجمان کے مطابق فائر بریگیڈ کے عملے نے بروقت کارروائی کرتے ہوئے آگ پر قابو پا لیا اور کولنگ کا عمل مکمل کر لیا گیا۔ تاہم سرچ آپریشن کے دوران تہہ خانے سے ایک جھلسی ہوئی لاش برآمد ہوئی جس کی شناخت تاحال ممکن نہیں ہو سکی۔ چھپا ترجمان نے تصدیق کی ہے کہ جاں بحق ہونے والے شخص کی عمر تقریباً 45 برس ہے جس کی میت سول ہسپتال منتقل کر دی گئی ہے۔
یاد رہے کہ رواں برس 18 جنوری کو اسی تجارتی مرکز میں ایک خوفناک آتشزدگی کے نتیجے میں عمارت کے دو حصے تباہ ہو گئے تھے، جس کے بعد انتظامیہ نے عمارت کو غیر محفوظ قرار دے کر سیل کر دیا تھا۔ باوجود اس کے کہ عمارت کے اطراف میں رکاوٹیں کھڑی کی گئی تھیں، سوشل میڈیا پر ایسی ویڈیوز گردش کرتی رہی ہیں جن میں نشے کے عادی افراد کو عمارت میں داخل ہو کر سامان چوری کرتے ہوئے دیکھا جا سکتا ہے۔
عید کے دوسرے روز پیش آنے والا یہ واقعہ اسی سلسلے کی کڑی معلوم ہوتا ہے۔ مقامی حکام کا کہنا ہے کہ آگ لگنے کی وجہ عمارت میں غیر قانونی طور پر داخل ہونے والے افراد کی غفلت ہو سکتی ہے۔ پولیس نے اس واقعے کے تناظر میں تین مشتبہ افراد کو حراست میں لے لیا ہے، جبکہ اس بات پر شدید سوالات اٹھائے جا رہے ہیں کہ سیل شدہ عمارت میں غیر متعلقہ افراد کی رسائی کیسے ممکن ہوئی۔
