پاکستان تحریک انصاف کی پنجاب آرگنائزر عالیہ حمزہ کو لاہور سے گرفتار کر لیا گیا ہے۔ ذرائع کے مطابق عالیہ حمزہ عید کی چھٹیاں اپنے اہل خانہ کے ساتھ منانے کے لیے لاہور پہنچی تھیں کہ اس دوران پولیس نے انہیں حراست میں لے لیا۔
عالیہ حمزہ کے خلاف متعدد مقدمات درج ہیں جن کے سلسلے میں ان کی گرفتاری عمل میں لائی گئی ہے۔ گرفتاری کے بعد انہیں نامعلوم مقام پر منتقل کر دیا گیا ہے۔ تاہم حکومتی یا پولیس حکام کی جانب سے اس حوالے سے تاحال کوئی باضابطہ بیان جاری نہیں کیا گیا ہے۔
یاد رہے کہ عالیہ حمزہ کو نو مئی کے ہنگامہ آرائی کیس میں عدالت کی جانب سے دس سال جبکہ دیگر مقدمات میں پانچ سال قید کی سزا سنائی جا چکی ہے۔ شادمان تھانے کو نذر آتش کرنے کے مقدمے میں عالیہ حمزہ سمیت انیس ملزمان نامزد ہیں، جن میں شاہ محمود قریشی، یاسمین راشد، عمر سرفراز چیمہ، اعجاز چوہدری، میاں محمود الرشید اور صنم جاوید بھی شامل ہیں۔
