امریکی نائب صدر جے ڈی وینس نے واضح کیا ہے کہ واشنگٹن ایران کے ساتھ جنگ کو طول دینے کا کوئی ارادہ نہیں رکھتا اور اپنے اہداف کے حصول کے بعد تنازع سے نکل جائے گا۔
ایک انٹرویو کے دوران جے ڈی وینس نے کہا کہ امریکہ ایران کے اندر اپنے زیادہ تر فوجی مقاصد حاصل کر چکا ہے تاہم صدر ڈونلڈ ٹرمپ چاہتے ہیں کہ ایرانی حکومت کو طویل المدتی بنیادوں پر کمزور کرنے کے لیے آپریشنز کو محدود مدت تک جاری رکھا جائے۔
انہوں نے اعتراف کیا کہ تنازع کے باعث عالمی منڈی میں تیل کی قیمتوں میں اضافہ ہوا ہے لیکن ان کا کہنا تھا کہ یہ اضافہ عارضی ہے اور جنگ کے خاتمے کے ساتھ ہی قیمتیں مستحکم ہو جائیں گی۔
وینس نے اس عزم کا اعادہ کیا کہ امریکی انتظامیہ طویل فوجی مشغولیت کی خواہاں نہیں ہے اور اہداف مکمل ہوتے ہی انخلا عمل میں لایا جائے گا۔
اٹھائیس فروری کو امریکہ اور اسرائیل کے ایران پر حملوں سے شروع ہونے والی یہ جنگ اب دوسرے مہینے میں داخل ہو چکی ہے۔ اس تنازع کے نتیجے میں ایران، اسرائیل، لبنان اور خلیجی ممالک میں ہزاروں افراد ہلاک اور لاکھوں بے گھر ہو چکے ہیں جبکہ عالمی معیشت کو بھی شدید دھچکا لگا ہے۔
ایران کی جانب سے خطے بھر میں امریکی اور اسرائیلی تنصیبات کو ڈرون اور میزائل حملوں کا نشانہ بنایا جا رہا ہے۔ ہفتے کے روز تہران نے دبئی میں بھی حملوں کا دعویٰ کیا جن میں امریکی ٹھکانوں کے ساتھ ساتھ یوکرینی اینٹی ڈرون سسٹمز سے منسلک ایک تنصیب کو بھی ہدف بنایا گیا۔
اس صورتحال کے پیش نظر جنگ بندی کے لیے سفارتی کوششیں تیز ہو گئی ہیں۔ سعودی عرب، ترکی اور مصر کے وزرائے خارجہ جلد اسلام آباد پہنچیں گے جہاں وہ پاکستان کی اعلیٰ قیادت کے ساتھ کشیدگی میں کمی اور معاشی، سیاسی و سکیورٹی تعاون کے امور پر تبادلہ خیال کریں گے۔
