پنجاب ڈیزاسٹر مینجمنٹ اتھارٹی (پی ڈی ایم اے) نے صوبے بھر میں کل سے چار اپریل تک موسلا دھار بارشوں کی پیش گوئی کرتے ہوئے ہائی الرٹ جاری کر دیا ہے۔ محکمہ موسمیات کے مطابق بارشوں کا یہ سلسلہ صوبے کے بیشتر اضلاع کو اپنی لپیٹ میں لے گا۔
متاثرہ علاقوں میں راولپنڈی، مری، گلیات، اٹک، جہلم، چکوال، تلہ گنگ، گوجرانوالہ، حافظ آباد، وزیر آباد، سرگودھا، میانوالی، شیخوپورہ، گجرات، خوشاب اور منڈی بہاؤالدین شامل ہیں۔ علاوہ ازیں لاہور، سیالکوٹ، نارووال، فیصل آباد، جھنگ، چنیوٹ، بھکر، لیہ اور ڈیرہ غازی خان میں بھی گرج چمک کے ساتھ بارش متوقع ہے۔
پی ڈی ایم اے کے ترجمان نے خبردار کیا ہے کہ ڈیرہ غازی خان اور کوہ سلیمان کے برساتی نالوں میں پانی کی سطح بلند ہو سکتی ہے۔ وزیراعلیٰ پنجاب کی خصوصی ہدایات پر تمام کمشنرز، ڈپٹی کمشنرز، ضلعی انتظامیہ اور ریسکیو اداروں کو ہنگامی صورتحال سے نمٹنے کے لیے تیار رہنے کی ہدایت کی گئی ہے۔
شہریوں کو مشورہ دیا گیا ہے کہ وہ آسمانی بجلی سے بچنے کے لیے محفوظ مقامات پر رہیں اور طوفانی صورتحال میں کھلے مقامات پر پناہ لینے سے گریز کریں۔ پہاڑی علاقوں میں لینڈ سلائیڈنگ کے خدشے کے پیش نظر سیاحوں کو احتیاطی تدابیر اختیار کرنے کی تاکید کی گئی ہے۔ کسانوں سے بھی کہا گیا ہے کہ وہ اپنی فصلوں اور مویشیوں کے تحفظ کے لیے بروقت اقدامات کریں۔ کسی بھی ہنگامی صورتحال میں شہری پی ڈی ایم اے کی ہیلپ لائن 1129 پر رابطہ کر سکتے ہیں۔
