مشرق وسطیٰ میں جاری کشیدگی کے باعث پاکستان بھر میں فضائی آپریشن بری طرح متاثر ہوا ہے اور منگل کے روز مجموعی طور پر 62 پروازیں منسوخ کر دی گئی ہیں۔
ایوی ایشن ذرائع کے مطابق کراچی سے دبئی، دوحہ، جدہ، ابوظہبی اور بحرین جانے والی کم از کم 12 پروازیں منسوخ کی گئی ہیں۔
لاہور سے بھی صورتحال کے پیش نظر 11 پروازیں منسوخ کی گئی ہیں جن میں دوحہ، کویت، جدہ، شارجہ، دبئی اور نجف جانے والی پروازیں شامل ہیں۔
اسلام آباد ایئرپورٹ سے بھی فضائی رابطے متاثر ہوئے ہیں جہاں تاشقند، العین، دوحہ، ریاض، جدہ، دبئی، بحرین اور شارجہ کے لیے 23 پروازیں منسوخ کر دی گئی ہیں۔
ملکی سطح پر بھی فضائی آپریشن غیر معمولی تعطل کا شکار رہا۔ کراچی سے لاہور کے لیے دو جبکہ اسلام آباد، سکردو اور گلگت کے لیے چھ پروازیں منسوخ کر دی گئی ہیں۔
مشرق وسطیٰ میں بڑھتی ہوئی کشیدگی کے باعث پاکستان کا خلیجی ممالک اور دیگر علاقائی مقامات کے ساتھ فضائی رابطہ تاحال شدید متاثر ہے۔
