غزہ کی پٹی میں منگل کے روز اسرائیلی فضائی حملوں کے نتیجے میں کم از کم پانچ فلسطینی شہری جاں بحق ہو گئے۔ طبی حکام کے مطابق پہلا حملہ شمالی غزہ کے علاقے جبالیہ میں ہوا جس میں تین افراد لقمہ اجل بنے، جبکہ خان یونس میں ہونے والے دوسرے حملے میں مزید دو افراد ہلاک ہوئے۔ ان واقعات پر اسرائیلی فوج کی جانب سے تاحال کوئی باضابطہ بیان سامنے نہیں آیا ہے۔
یہ تازہ ترین تشدد ایک ایسے وقت میں ہوا ہے جب امریکہ کی ثالثی میں طے پانے والا پانچ ماہ پرانا جنگ بندی معاہدہ شدید خطرات کی زد میں ہے۔ حماس اور اسرائیل دونوں ایک دوسرے پر معاہدے کی خلاف ورزیوں کا الزام عائد کر رہے ہیں۔ غزہ کی وزارت صحت کے مطابق جنگ بندی کے بعد سے اب تک اسرائیلی کارروائیوں میں کم از کم 700 فلسطینی شہید ہو چکے ہیں، جبکہ اسی عرصے کے دوران چار اسرائیلی فوجی بھی ہلاک ہوئے ہیں۔
خطے میں جاری کشیدگی کا دائرہ وسیع ہوتا جا رہا ہے۔ اسرائیل اس وقت امریکہ کے ساتھ مل کر ایران کے خلاف محاذ پر موجود ہے، جبکہ اسرائیلی افواج نے ایران حمایت یافتہ حزب اللہ کے خلاف جنوبی لبنان میں بھی زمینی کارروائی شروع کر رکھی ہے۔
غزہ کے محکمہ صحت کے اعداد و شمار کے مطابق گزشتہ دو برسوں کے دوران جاری اسرائیلی جارحیت میں 72 ہزار سے زائد فلسطینی شہید ہو چکے ہیں جن میں اکثریت عام شہریوں کی ہے۔ اس طویل مہم کے نتیجے میں غزہ کا بیشتر حصہ کھنڈر بن چکا ہے، قحط کی صورتحال پیدا ہو گئی ہے اور آبادی کی بڑی تعداد بارہا نقل مکانی پر مجبور ہوئی ہے۔
یاد رہے کہ سات اکتوبر 2023 کو حماس کے اسرائیل پر حملوں کے دوران اسرائیلی اعداد و شمار کے مطابق 1200 افراد ہلاک اور 251 کو یرغمال بنایا گیا تھا۔
