صدر مملکت آصف علی زرداری اور وزیراعظم شہباز شریف نے خیبر پختونخوا کے اضلاع خیبر اور بنوں میں سیکیورٹی فورسز کے کامیاب آپریشنز کو خراج تحسین پیش کیا ہے۔ ان کارروائیوں کے دوران فتنہ الخوارج کے تیرہ دہشت گردوں کو ہلاک کیا گیا۔
صدر مملکت نے اپنے بیان میں کہا کہ بیرونی عناصر کی پشت پناہی سے سرگرم دہشت گردوں کے خلاف آپریشنز کا سلسلہ جاری رہنا چاہیے تاکہ قومی سلامتی کو یقینی بنایا جا سکے اور شہریوں کے جان و مال کا تحفظ کیا جا سکے۔
وزیراعظم شہباز شریف نے سیکیورٹی فورسز کی پیشہ ورانہ مہارت کو سراہتے ہوئے کہا کہ ہمارے جوان ملک کے تحفظ کے لیے دہشت گردی کے سامنے آہنی دیوار بن کر کھڑے ہیں۔
صدر اور وزیراعظم نے ملک سے دہشت گردی کی لعنت کو جڑ سے اکھاڑ پھینکنے کے اپنے غیر متزلزل عزم کا اعادہ کیا ہے۔ حکومتی قیادت کا کہنا ہے کہ ملک میں امن و امان کا قیام اولین ترجیح ہے اور اس مقصد کے لیے ہر ممکن اقدام اٹھایا جائے گا۔
