ایرانی صدر مسعود پزشکیان نے امریکی عوام کے نام لکھے گئے ایک خط میں واضح کیا ہے کہ ان کا ملک عام امریکی شہریوں کے خلاف کسی قسم کی دشمنی نہیں رکھتا۔ پریس ٹی وی کی رپورٹ کے مطابق، ایرانی صدر نے اس بات پر زور دیا کہ ایران کو ایک خطرہ قرار دینے کا بیانیہ نہ تو تاریخی حقائق سے مطابقت رکھتا ہے اور نہ ہی موجودہ زمینی صورتحال سے۔
صدر پزشکیان نے امریکی خارجہ پالیسی پر سوال اٹھاتے ہوئے امریکی شہریوں سے مطالبہ کیا کہ وہ غور کریں کہ کیا واشنگٹن واقعی اپنے قومی مفادات کے تحت کام کر رہا ہے یا اپنے اتحادیوں کے ایجنڈے کی تکمیل کر رہا ہے۔ انہوں نے کہا کہ یہ خط ان لوگوں کے لیے ہے جو مسخ شدہ حقائق کے سیلاب میں سچائی تلاش کر رہے ہیں۔
ایرانی صدر نے دعویٰ کیا کہ جدید تاریخ میں ایران نے کبھی جارحیت، توسیع پسندی یا نوآبادیاتی نظام کی راہ اختیار نہیں کی، بلکہ ہمیشہ بیرونی خطرات کے خلاف اپنے دفاع کو ترجیح دی ہے۔ انہوں نے حکومتوں اور عوام کے درمیان فرق کو واضح کرتے ہوئے کہا کہ ایرانی عوام امریکی شہریوں کے خلاف کوئی تعصب نہیں رکھتے، اور یہ ان کی ثقافت کا گہرا حصہ ہے۔
پزشکیان کے مطابق ایران کو عالمی خطرہ قرار دینے کا تاثر سیاسی طور پر تخلیق کیا گیا ہے تاکہ خطے میں عسکری موجودگی، اقتصادی دباؤ اور اسلحہ سازی کے فروغ کو جواز فراہم کیا جا سکے۔ انہوں نے خطے میں امریکی فوجی اڈوں کو کشیدگی کا بڑا سبب قرار دیا اور کہا کہ ایران کا عسکری مؤقف خالصتاً دفاعی نوعیت کا ہے۔
خط میں انیس سو ترپن کے فوجی بغاوت کا حوالہ دیتے ہوئے اسے امریکی مداخلت قرار دیا گیا جس نے ایران کے جمہوری عمل کو نقصان پہنچایا۔ انہوں نے سابقہ ایرانی بادشاہت کی حمایت، ایران عراق جنگ کے دوران عراق کی پشت پناہی اور ایران پر عائد معاشی پابندیوں کو دونوں ممالک کے درمیان عدم اعتماد کی بنیادی وجوہات قرار دیا۔
موجودہ تنازع کے حوالے سے صدر پزشکیان نے کہا کہ امریکی اڈوں سے ہونے والی عسکری کارروائیاں خطے کے لیے خطرناک ہیں۔ انہوں نے واضح کیا کہ ایران کے اقدامات جائز دفاع کا حصہ ہیں اور وہ جنگ کے نتیجے میں شہریوں کو پہنچنے والے ناقابل تلافی نقصانات پر گہری تشویش رکھتے ہیں۔ انہوں نے خبردار کیا کہ جب جنگ انسانی زندگیوں اور مستقبل کو تباہ کرتی ہے تو لوگ اس کے ذمہ داروں کو کبھی معاف نہیں کرتے۔
