وزیراعلیٰ پنجاب مریم نواز شریف نے صوبے میں صحت کی سہولیات کی فراہمی کے حوالے سے منعقدہ اعلیٰ سطحی اجلاس کی صدارت کی۔ اس موقع پر انہوں نے صحت کے چار اہم منصوبوں کا تفصیلی جائزہ لیا اور سرکاری ہسپتالوں میں مفت طبی علاج کی فراہمی کے عزم کا اعادہ کیا۔
اجلاس کو بریفنگ دیتے ہوئے بتایا گیا کہ بچوں کی دل کی سرجری کے پروگرام کے تحت اب تک 16 ہزار 625 بچوں کی رجسٹریشن مکمل کی جا چکی ہے جن میں سے 11 ہزار سے زائد کامیاب آپریشنز کیے جا چکے ہیں۔ پنجاب کے سرکاری ہسپتالوں میں بچوں کے 7 ہزار 664 کارڈیک آپریشنز اور متعلقہ طبی طریقہ کار مکمل کیے گئے۔
حکام نے مزید بتایا کہ اس اقدام میں نجی ہسپتالوں کو بھی شامل کیا گیا ہے جہاں 3 ہزار 802 مستحق بچوں کا علاج سرکاری خرچ پر کیا گیا۔
وزیراعلیٰ اسپیشل ٹرانسپلانٹ پروگرام کے تحت 2 ہزار ایک مریضوں کی رجسٹریشن کی گئی جن میں سے ایک ہزار 574 ٹرانسپلانٹ کامیابی سے مکمل ہوئے ہیں۔ ان میں 255 جگر کے ٹرانسپلانٹ شامل ہیں جو مکمل طور پر مفت فراہم کیے گئے، جس پر حکومتِ پنجاب نے فی آپریشن تقریباً 65 لاکھ روپے خرچ کیے۔
اس پروگرام کے ذریعے 799 گردوں کی پیوند کاری، 460 کوکلیئر امپلانٹس، 32 کارنیل اور 28 بون میرو ٹرانسپلانٹ بھی مفت کیے گئے۔ ڈائیلاسز پروگرام کے اعداد و شمار کے مطابق 38 ہزار 125 مریض رجسٹرڈ ہیں اور اب تک 15 لاکھ سے زائد ڈائیلاسز کے عمل مکمل کیے جا چکے ہیں۔
مریم نواز شریف نے اس عزم کا اظہار کیا کہ حکومت تمام شہریوں کو صحت کی بہترین سہولیات فراہم کرنے کے لیے پرعزم ہے۔ انہوں نے اس بات پر زور دیا کہ امیر اور غریب طبقے کے بچوں کو یکساں طبی نگہداشت اور توجہ ملنی چاہیے۔
