وزارت خارجہ پاکستان نے خبردار کیا ہے کہ بھارت کی جانب سے پاکستان کی سفارتی کوششوں کو نشانہ بنانے کے لیے جعلی خبروں کا ایک نیا سلسلہ شروع کیا گیا ہے۔ خاص طور پر ایران اور امریکہ کے مابین موجودہ کشیدگی کے تناظر میں پاکستان کے مؤقف کو مسخ کرنے کی منظم کوششیں کی جا رہی ہیں۔
ترجمان دفتر خارجہ طاہر حسین اندرابی نے کہا ہے کہ بھارت اور بین الاقوامی سطح پر من گھڑت رپورٹس پھیلائی جا رہی ہیں تاکہ پاکستان کے سفارتی اقدامات کو غلط رنگ دیا جا سکے۔ انہوں نے ان افواہوں کو پھیلانے والوں کو تصدیق شدہ جھوٹا قرار دیتے ہوئے کہا کہ یہ عناصر عوام کو گمراہ کرنے کے درپے ہیں۔
ترجمان نے وضاحت کی کہ ایران کی وزارت خارجہ سے منسوب ایک بیان کو بھی توڑ مروڑ کر پیش کیا گیا جس کے بعد تہران کی جانب سے باضابطہ تردید جاری کرنا پڑی۔
دفتر خارجہ نے عوام پر زور دیا ہے کہ وہ ایسی گمراہ کن مہمات کے حوالے سے چوکس رہیں اور کسی بھی معلومات کو شیئر کرنے سے قبل اس کی تصدیق کو یقینی بنائیں۔
