تہران نے دعویٰ کیا ہے کہ ایرانی پاسداران انقلاب نے ملک کے وسطی حصے میں امریکی ایف پینتیس لڑاکا طیارے کو مار گرایا ہے۔ نیم سرکاری خبر رساں ادارے تسنیم کے مطابق طیارے کی تباہی کے بعد پائلٹ کی قسمت کے بارے میں تاحال کوئی معلومات سامنے نہیں آ سکیں۔ اٹھائیس فروری سے شروع ہونے والی کشیدگی کے بعد یہ دوسرا موقع ہے جب ایران نے امریکی ایف پینتیس طیارہ گرانے کا دعویٰ کیا ہے۔
اس سے قبل انیس مارچ کو بھی ایران نے اسی طرح کے دعوے کیے تھے جنہیں واشنگٹن نے مسترد کر دیا تھا۔ امریکی حکام کی جانب سے موجودہ واقعے پر تاحال کوئی ردعمل سامنے نہیں آیا ہے۔ گزشتہ ماہ امریکی فوج نے ایک بیان میں تسلیم کیا تھا کہ ایک ایف پینتیس طیارے نے ایران کے اوپر جنگی مشن کے دوران ہنگامی لینڈنگ کی تھی اور پائلٹ کی حالت خطرے سے باہر تھی۔
ایران نے جمعرات کے روز ایک اسرائیلی ایف سولہ طیارہ مار گرانے کا دعویٰ بھی کیا تھا۔ خطے میں جاری کشیدگی کے دوران کویت پیٹرولیم کارپوریشن نے تصدیق کی ہے کہ مینا الاحمدی ریفائنری پر ڈرون حملے کیے گئے جس سے تنصیبات میں آگ لگ گئی تاہم کوئی جانی نقصان نہیں ہوا۔ سعودی وزارت دفاع نے بھی بتایا ہے کہ ان کے فضائی دفاعی نظام نے گزشتہ چند گھنٹوں کے دوران سات ڈرونز کو فضا میں ہی ناکارہ بنا دیا ہے۔
دریں اثنا الجزیرہ کی رپورٹ کے مطابق ایران کے صوبہ بوشہر میں ہلال احمر کے گودام کو ڈرون حملے کا نشانہ بنایا گیا۔ فارس نیوز ایجنسی کے مطابق صبح پانچ بجے چوگھاڈک کے علاقے میں ہونے والے اس حملے میں امدادی سامان کے دو کنٹینرز، دو بسیں اور ایمرجنسی گاڑیاں تباہ ہو گئیں۔ حکام کا کہنا ہے کہ اس حملے میں کسی قسم کے جانی نقصان کی اطلاع نہیں ملی ہے۔
