حکومت پنجاب نے بڑھتی ہوئی مہنگائی اور عالمی معاشی بحران کے پیش نظر عوام کو ریلیف فراہم کرنے کے لیے صوبے بھر میں پبلک ٹرانسپورٹ کو مفت کرنے کا اعلان کر دیا ہے۔ وزیراعلیٰ مریم نواز شریف کی جانب سے جاری کردہ اس پیکیج کے تحت شہری اورنج لائن ٹرین، میٹرو بس سروس، سپیڈو بس اور گرین الیکٹرک بسوں میں بلا معاوضہ سفر کر سکیں گے۔
وزیراعلیٰ پنجاب نے زرعی شعبے اور کسانوں کے تحفظ کے لیے بھی خصوصی امداد کا اعلان کیا ہے۔ اس اقدام کے تحت کسانوں کو ڈیزل پر فی ایکڑ 100 روپے فی لیٹر سبسڈی فراہم کی جائے گی۔ اس کے علاوہ موٹر سائیکل مالکان کے لیے بھی ریلیف کا اعلان کیا گیا ہے جس کے مطابق ہر رجسٹرڈ بائیک ہولڈر کو 20 لیٹر ایندھن پر 100 روپے فی لیٹر سبسڈی دی جائے گی۔
مریم نواز شریف نے پیکیج کا اعلان کرتے ہوئے وزیراعظم شہباز شریف کی کاوشوں کو سراہا اور کہا کہ عالمی سطح پر ایندھن کی قیمتوں میں اضافے اور چیلنجز کے باوجود وزیراعظم نے ملک میں پیٹرولیم مصنوعات کی فراہمی کو یقینی بنایا۔ انہوں نے مزید کہا کہ مشکل معاشی حالات کے باوجود حکومت عوام کو تنہا نہیں چھوڑے گی اور عوام پر معاشی بوجھ کم کرنے کے لیے ہر ممکن کوشش جاری رہے گی۔
وزیراعلیٰ نے شہریوں سے اپیل کی کہ موجودہ حالات میں نجی گاڑیوں کے بجائے پبلک ٹرانسپورٹ کا استعمال کریں۔ انہوں نے وضاحت کی کہ عالمی جنگ کے باعث پیدا ہونے والے معاشی بحران سے پاکستان بھی متاثر ہوا ہے کیونکہ ملک کا زیادہ تر انحصار درآمدی تیل پر ہے۔
واضح رہے کہ حال ہی میں وفاقی حکومت نے پیٹرول کی قیمت میں 137.23 روپے اضافے کے بعد اسے 458.41 روپے فی لیٹر مقرر کیا ہے جبکہ ہائی سپیڈ ڈیزل کی قیمت 184.49 روپے اضافے کے ساتھ 520.35 روپے فی لیٹر تک پہنچ گئی ہے۔ حکومت نے پیٹرول پر پیٹرولیم لیوی میں بھی 55 روپے کا اضافہ کیا ہے جس کے بعد یہ شرح 160.61 روپے فی لیٹر ہو گئی ہے۔ رواں مالی سال کے لیے پیٹرولیم لیوی کا ہدف 1468 ارب روپے مقرر کیا گیا ہے جبکہ آئی ایم ایف کے دباؤ کے باعث پیٹرول اور ڈیزل پر دی جانے والی سابقہ سبسڈیز واپس لے لی گئی ہیں۔
