کراچی کے علاقے گلشن اقبال میں لیاری ایکسپریس وے پل پر افسوسناک ٹریفک حادثہ پیش آیا ہے جس کے نتیجے میں ایک شخص جاں بحق جبکہ دوسرا زخمی ہو گیا ہے۔
ہفتے کی شب پیش آنے والے اس حادثے میں ایک تیز رفتار پک اپ بے قابو ہو کر فٹ پاتھ سے ٹکرا گئی جس کے بعد گاڑی الٹ گئی۔ حادثے کی شدت کے باعث ایک شخص موقع پر ہی دم توڑ گیا۔
اطلاع ملتے ہی پولیس اور امدادی ٹیمیں جائے وقوعہ پر پہنچ گئیں۔ ریسکیو ذرائع کے مطابق جاں بحق ہونے والے شخص کی شناخت 25 سالہ حمزہ کے نام سے ہوئی ہے۔
امدادی کارروائیوں کے دوران لاش اور زخمی ہونے والے دوسرے شخص کو طبی امداد کے لیے عباسی شہید ہسپتال منتقل کر دیا گیا ہے۔ پولیس نے واقعے کی مزید تفتیش شروع کر دی ہے۔
