کراچی بورڈ آف سیکنڈری ایجوکیشن نے میٹرک کے سالانہ امتحانات کی تاریخ میں تبدیلی کا اعلان کر دیا ہے۔ امتحانات جو پہلے سات اپریل سے شروع ہونا تھے اب دس اپریل بروز جمعہ سے شروع ہوں گے۔
چیئرمین بورڈ غلام حسین کے مطابق امتحانات کی تاریخ میں یہ تبدیلی طلبہ کے بہترین مفاد میں کی گئی ہے تاکہ انہیں بہتر سہولیات کی فراہمی کو یقینی بنایا جا سکے۔
دوسری جانب پرائیویٹ اسکولز ایسوسی ایشن نے بورڈ انتظامیہ پر کڑی تنقید کرتے ہوئے الزام عائد کیا ہے کہ امتحانات کا التواء دراصل وقت پر ایڈمٹ کارڈز جاری کرنے میں ناکامی کا نتیجہ ہے۔
ذرائع کا کہنا ہے کہ امتحانات کے التواء کی بنیادی وجہ امتحانی فارمز کا تاخیر سے جمع ہونا ہے۔ متعدد اسکول مقررہ تاریخ تک فارمز جمع کروانے میں ناکام رہے جبکہ گزشتہ تین روز کے دوران ہزاروں فارمز لیٹ فیس کے ساتھ جمع کروائے گئے ہیں۔
