وزیراعظم شہباز شریف نے متحدہ عرب امارات کی بندرگاہ پر میزائل حملے کے واقعے پر گہری تشویش کا اظہار کیا ہے۔ اس حملے کے نتیجے میں شہریوں سمیت متعدد پاکستانی بھی زخمی ہوئے ہیں۔
سماجی رابطے کی ویب سائٹ ایکس پر اپنے بیان میں وزیراعظم نے کہا کہ حکومت خورفکان پورٹ پر پیش آنے والے واقعے میں زخمی ہونے والے پاکستانیوں کی صورتحال پر کڑی نظر رکھے ہوئے ہے۔ انہوں نے زخمیوں کی جلد صحت یابی کے لیے دعا بھی کی۔
وزیراعظم نے واضح کیا کہ متاثرین کو ہر ممکن مدد فراہم کرنے کے لیے پرعزم ہیں۔ اس ضمن میں پاکستانی حکام متحدہ عرب امارات کی انتظامیہ کے ساتھ مسلسل رابطے میں ہیں تاکہ زخمیوں کو بہترین سہولیات کی فراہمی یقینی بنائی جا سکے۔
شہباز شریف نے پاکستان کی جانب سے متحدہ عرب امارات کے عوام کے ساتھ مکمل یکجہتی کا اعادہ کیا۔ انہوں نے دونوں ممالک کو برادر اسلامی ملک قرار دیتے ہوئے باہمی تعلقات کی اہمیت پر زور دیا۔
وزیراعظم نے خطے میں کشیدگی کم کرنے کے لیے صبر اور تحمل کا مظاہرہ کرنے کی ضرورت پر بھی زور دیا تاکہ حالات کو مزید خراب ہونے سے بچایا جا سکے۔
