امریکی صدر ڈونلڈ ٹرمپ نے کیلیفورنیا کے گورنر کے آئندہ انتخابات کے لیے سابق برطانوی حکومتی مشیر اور فاکس نیوز کے میزبان اسٹیو ہلٹن کی باضابطہ حمایت کا اعلان کر دیا ہے۔
اسٹیو ہلٹن دوہری شہریت کے حامل ہیں اور وہ سابق برطانوی وزیر اعظم ڈیوڈ کیمرون کے ڈائریکٹر برائے حکمت عملی کے طور پر خدمات انجام دے چکے ہیں۔ وہ 2012 میں ڈاؤننگ اسٹریٹ چھوڑ کر کیلیفورنیا منتقل ہوئے تھے۔
سوشل میڈیا پلیٹ فارم ٹروتھ سوشل پر جاری اپنے بیان میں ڈونلڈ ٹرمپ کا کہنا تھا کہ وہ اسٹیو ہلٹن کو برسوں سے جانتے ہیں اور ان کا احترام کرتے ہیں۔ ٹرمپ نے زور دیا کہ وفاقی تعاون اور اسٹیو ہلٹن جیسے گورنر کی موجودگی میں کیلیفورنیا پہلے سے کہیں زیادہ بہتر ہو سکتا ہے۔ انہوں نے ہلٹن کی مکمل حمایت کا اعلان کیا۔
کیلیفورنیا کے قوانین کے تحت دو جون کو ہونے والے اوپن پرائمری مقابلے میں سرفہرست دو امیدوار نومبر کے انتخابات میں حصہ لینے کے اہل ہوں گے، قطع نظر اس کے کہ ان کا تعلق کس سیاسی جماعت سے ہے۔
رائے عامہ کے جائزوں کے مطابق ریپبلکن امیدوار اسٹیو ہلٹن اور ریور سائیڈ کاؤنٹی کے شیرف چیڈ بیانکو کا مقابلہ تین ڈیموکریٹ امیدواروں ایرک سوالویل، کیٹی پورٹر اور ارب پتی کارکن ٹام سٹیر سے متوقع ہے۔
ہلٹن اور بیانکو دونوں ہی ڈونلڈ ٹرمپ کے حامی ہیں تاہم اپنی انتخابی مہم کے دوران وہ کرائم اور بلند ٹیکسوں جیسے ریاستی مسائل پر توجہ مرکوز کیے ہوئے ہیں۔ موجودہ گورنر گیون نیوسم کی مدت ملازمت مکمل ہو رہی ہے۔ یاد رہے کہ آرنلڈ شوارزنیگر 2003 سے 2011 تک کیلیفورنیا کے آخری ریپبلکن گورنر تھے۔
