امریکی نائب صدر جے ڈی وینس اہم مذاکرات میں شرکت کے لیے پاکستان روانہ ہو گئے ہیں۔ اسلام آباد میں ہونے والے ایران اور امریکہ کے درمیان مذاکرات میں امریکی وفد کی قیادت نائب صدر جے ڈی وینس کریں گے۔ پاکستان کی ثالثی میں ہونے والے یہ مذاکرات کل منعقد ہوں گے۔
روانگی سے قبل گفتگو کرتے ہوئے جے ڈی وینس نے کہا کہ وہ صدر ڈونلڈ ٹرمپ کی ہدایات کے مطابق ان مذاکرات میں حصہ لے رہے ہیں۔ انہوں نے امید ظاہر کی کہ ایران کے ساتھ ہونے والی بات چیت مثبت نتائج کی حامل ہوگی۔
امریکی وفد میں نائب صدر جے ڈی وینس کے علاوہ خصوصی نمائندے اسٹیو وٹکوف اور صدر ٹرمپ کے داماد جیرڈ کشنر شامل ہیں۔ ایرانی وفد کی نمائندگی وزیر خارجہ عباس عراقچی اور ایرانی پارلیمنٹ کے اسپیکر محمد باقر قالیباف کریں گے۔
ترجمان دفتر خارجہ کے مطابق دونوں وفود اور ان کے ہمراہ آنے والے صحافیوں کے لیے ویزا فری سفری سہولیات فراہم کی گئی ہیں۔
وزیراعظم شہباز شریف نے مذاکرات کے مقام کا دورہ کیا اور سیکیورٹی انتظامات کا جائزہ لیا۔ مذاکرات میں شریک وفود کو ریڈ زون کے ایک فائیو اسٹار ہوٹل میں ٹھہرایا گیا ہے۔ ضلعی انتظامیہ نے ریڈ زون کی حدود کو زیرو پوائنٹ سے فیصل مسجد تک توسیع دے دی ہے۔
ریڈ زون میں پارلیمنٹ ہاؤس، ایوان صدر، وزیراعظم ہاؤس اور سفارتی انکلیو جیسی اہم سرکاری عمارتیں شامل ہیں۔ وزارت داخلہ کے حکام کا کہنا ہے کہ ریڈ زون کی سیکیورٹی فوج کے پاس رہے گی جبکہ رینجرز اور پولیس کے دستے بھی تعینات کیے گئے ہیں۔
