بیجنگ میں چینی صدر شی جن پنگ اور تائیوان کی اپوزیشن جماعت کومنتانگ کی سربراہ چینگ لی وون کے درمیان اہم ملاقات ہوئی ہے۔ اس ملاقات میں صدر شی جن پنگ نے اس عزم کا اعادہ کیا کہ تائیوان اور چین کے عوام کا اتحاد ایک ناگزیر تاریخی حقیقت ہے جس پر انہیں مکمل اعتماد ہے۔
صدر شی جن پنگ نے کہا کہ آبنائے تائیوان کے دونوں جانب بسنے والے ہم وطنوں کے درمیان قربت اور اتحاد کا رجحان کسی صورت تبدیل نہیں ہو سکتا۔ انہوں نے مزید کہا کہ بیجنگ تائیوان کی آزادی کی مخالفت کی مشترکہ سیاسی بنیاد پر کومنتانگ سمیت تائیوان کے دیگر گروہوں کے ساتھ مذاکرات کو مضبوط بنانے کے لیے تیار ہے۔
چینگ لی وون نے ملاقات کے دوران کہا کہ آبنائے تائیوان کو مستقبل میں تنازعات کا مرکز نہیں بننا چاہیے اور دونوں فریقین کو سیاسی محاذ آرائی سے بالاتر ہو کر سوچنا ہوگا۔ انہوں نے یہ بھی دعویٰ کیا کہ صدر شی نے بین الاقوامی تنظیموں جیسے انٹرپول اور علاقائی تجارتی معاہدوں میں تائیوان کی شرکت کی تجویز پر مثبت ردعمل دیا ہے۔
یہ دورہ امریکی صدر ڈونلڈ ٹرمپ کے متوقع دورہ بیجنگ سے ایک ماہ قبل عمل میں آیا ہے۔ تائیوان میں دفاعی بجٹ کے حوالے سے جاری سیاسی کشمکش کے دوران چینگ لی وون کا یہ دورہ انتہائی اہمیت کا حامل ہے۔ تائیوان کی حکومت 1.25 ٹریلین تائیوانی ڈالر کے دفاعی اخراجات کا منصوبہ رکھتی ہے تاہم اپوزیشن اس پر تحفظات کا شکار ہے۔
چینگ لی وون نے تائیوان حکومت کے دفاعی بجٹ کے منصوبے پر تنقید کرتے ہوئے کہا کہ تائیوان کوئی اے ٹی ایم مشین نہیں ہے۔ انہوں نے امریکی ہتھیاروں کی خریداری کے لیے 380 ارب تائیوانی ڈالر مختص کرنے کی تجویز کی حمایت کی ہے۔
چین آمد سے قبل شنگھائی پہنچنے پر چینگ لی وون نے کہا تھا کہ دنیا جس جنگ کے خطرے سے خوفزدہ ہے، آبنائے تائیوان کے دونوں اطراف کے لوگ اس کے مقدر نہیں ہیں۔ اپنے دورے کے دوران انہوں نے نانجنگ میں انقلابی رہنما سن یات سین کے مزار پر حاضری بھی دی۔ کومنتانگ کی کسی سربراہ کا یہ ایک دہائی بعد چین کا پہلا دورہ ہے۔
