اسلام آباد میں غیر ملکی معززین کی آمد کے پیش نظر کیے گئے سکیورٹی انتظامات کے بعد شہر بھر میں بند کاروباری مراکز اور دکانیں کھولنے کی اجازت دے دی گئی ہے۔ انتظامیہ کی جانب سے اتوار کو جاری کردہ بیان میں کہا گیا ہے کہ وفاقی دارالحکومت کے بیشتر علاقوں میں تجارتی سرگرمیاں معمول کے مطابق بحال ہو گئی ہیں۔
ڈپٹی کمشنر عرفان نواز میمن نے تصدیق کی ہے کہ شہر بھر میں تمام مارکیٹیں اور دکانیں کھولنے کا فیصلہ کر لیا گیا ہے اور تاجروں کو اپنا کاروبار دوبارہ شروع کرنے کی ہدایت جاری کر دی گئی ہے۔
ایک نجی ٹی وی چینل سے گفتگو کرتے ہوئے ڈپٹی کمشنر نے واضح کیا کہ یہ اجازت شہر کے تمام علاقوں کے لیے ہے تاہم ایکسپریس وے کے مخصوص راستوں پر سکیورٹی پابندیاں بدستور برقرار رہیں گی۔
انتظامیہ کا کہنا ہے کہ مارکیٹوں کو بند کرنے کا فیصلہ وفاقی دارالحکومت میں غیر ملکی مہمانوں کی موجودگی اور انتہائی سخت حفاظتی اقدامات کے تناظر میں کیا گیا تھا۔ سکیورٹی صورتحال میں بہتری اور حالات کے معمول پر آنے کے بعد تجارتی مراکز کو کھولنے کی اجازت دی گئی ہے۔
