وزیراعظم شہباز شریف رواں ہفتے سعودی عرب کا دورہ کریں گے۔ باخبر ذرائع کے مطابق وزیراعظم یہ دورہ سعودی ولی عہد محمد بن سلمان کی دعوت پر کر رہے ہیں جس کے لیے وہ اعلیٰ سطح کے وفد کے ہمراہ آئندہ اڑتالیس گھنٹوں کے اندر ریاض روانہ ہوں گے۔ دونوں ممالک کے حکام اس دورے کے حتمی شیڈول کو حتمی شکل دینے میں مصروف ہیں۔
سفارتی حلقوں میں اس دورے کو انتہائی اہمیت کا حامل قرار دیا جا رہا ہے، خاص طور پر اسلام آباد میں حال ہی میں ہونے والے ایران اور امریکہ کے درمیان مذاکرات کے تناظر میں یہ پیش رفت انتہائی کلیدی سمجھی جا رہی ہے۔
اس سے قبل نائب وزیراعظم اور وزیر خارجہ اسحاق ڈار نے سعودی ہم منصب شہزادہ فیصل بن فرحان سے ٹیلی فون پر رابطہ کیا تھا۔ اس گفتگو کے دوران وزیر خارجہ نے سعودی ہم منصب کو اسلام آباد میں ہونے والے مذاکرات سے آگاہ کیا۔
ترجمان دفتر خارجہ کے مطابق اسحاق ڈار نے تمام فریقین کی جانب سے جنگ بندی کے معاہدوں پر عمل درآمد کی ضرورت پر زور دیا۔ انہوں نے اس عزم کا اعادہ کیا کہ پاکستان سفارتی کوششوں کو سہولت فراہم کرنے کے لیے اپنا کردار ادا کرنا جاری رکھے گا۔
