پاکستانی سیکیورٹی اداروں نے بھارت کی خفیہ ایجنسی را کے لیے جاسوسی کرنے کے الزام میں تین افراد کو گرفتار کر کے انہیں قانونی کارروائی کے بعد سزائیں سنا دی ہیں۔
ذرائع کے مطابق گرفتار ملزمان کا تعلق نارووال، بہاولپور اور آزاد کشمیر کے ضلع نیلم سے ہے۔ ابتدائی تفتیش کے دوران ملزمان نے اعتراف کیا ہے کہ انہیں سوشل میڈیا پلیٹ فارمز کے ذریعے جال میں پھنسایا گیا۔
تفتیشی حکام کے مطابق را سے منسلک خواتین نے دوستی، مالی فوائد اور دیگر ترغیبات کا لالچ دے کر ملزمان سے حساس معلومات حاصل کیں۔ سیکیورٹی ذرائع کا کہنا ہے کہ ملزمان کو رقوم کی منتقلی کے لیے ایزی پیسہ، کرپٹو والٹس اور بینک اکاؤنٹس کا استعمال کیا گیا۔
حکام کے مطابق ملزمان کے خلاف آفیشل سیکرٹ ایکٹ کے تحت مقدمہ درج کیا گیا تھا، جس کے بعد تمام قانونی تقاضے پورے کرتے ہوئے انہیں سزائیں سنا دی گئی ہیں۔
