برطانوی کابینہ کے وزیر اسٹیو ریڈ نے ان دعووں کو مسترد کر دیا ہے کہ ایران یورپ کو بیلسٹک میزائلوں سے نشانہ بنانے کی صلاحیت رکھتا ہے یا ایسا کوئی منصوبہ رکھتا ہے۔ انہوں نے واضح کیا ہے کہ اس نوعیت کے الزامات کی تائید کے لیے کوئی مصدقہ شواہد یا جائزے موجود نہیں ہیں۔
یہ بیان اسرائیلی دفاعی افواج کی جانب سے ہفتے کے روز سوشل میڈیا پر کیے گئے اس دعوے کے بعد سامنے آیا ہے جس میں کہا گیا تھا کہ ایران کے پاس ایسے میزائل موجود ہیں جو لندن، پیرس یا برلن تک پہنچ سکتے ہیں۔
برطانوی سیکریٹری برائے ہاؤسنگ اسٹیو ریڈ نے بی بی سی سے گفتگو کرتے ہوئے کہا کہ ان کے علم میں ایسی کوئی رپورٹ نہیں ہے جو یہ ثابت کر سکے کہ ایران یورپ کو ہدف بنانے کی کوشش کر رہا ہے، اور نہ ہی اس بات کا کوئی ثبوت ہے کہ ایران ایسا کرنے کی صلاحیت رکھتا ہے۔
دوسری جانب اسکائی نیوز کو دیے گئے ایک انٹرویو میں اسٹیو ریڈ نے امریکی صدر ٹرمپ کی جانب سے ایران کے پاور پلانٹس کو تباہ کرنے کی دھمکی پر تبصرہ کرتے ہوئے کہا کہ امریکی صدر اپنے بیانات کا دفاع کرنے کی مکمل صلاحیت رکھتے ہیں۔
برطانیہ کی پوزیشن واضح کرتے ہوئے انہوں نے کہا کہ ان کا ملک کسی بھی جنگ میں فریق نہیں بنے گا، تاہم وہ خطے میں اپنے مفادات کا تحفظ یقینی بنائے گا۔ انہوں نے مزید کہا کہ برطانیہ کشیدگی کو کم کرنے کے لیے اپنے اتحادیوں کے ساتھ مل کر کام جاری رکھے گا۔
