امریکی صدر ڈونلڈ ٹرمپ نے پیر کے روز اعلان کیا ہے کہ ایران کے ساتھ ہونے والی بات چیت مثبت اور نتیجہ خیز رہی ہے جس کے پیش نظر انہوں نے امریکی فوج کو ہدایت کی ہے کہ وہ ایرانی پاور پلانٹس اور توانائی کے بنیادی ڈھانچے پر کسی بھی فوجی حملے کو مؤخر کر دے۔
دوسری جانب ایران نے خبردار کیا ہے کہ اگر امریکہ یا اسرائیل نے اس کے ساحلی علاقوں یا جزائر پر جارحیت کی تو تہران خلیج فارس میں بحری بارودی سرنگیں بچھا دے گا۔ ایران کی نیشنل ڈیفنس کونسل نے سرکاری میڈیا کے ذریعے جاری بیان میں کہا ہے کہ دشمن کی جانب سے کسی بھی حملے کی صورت میں خلیج اور قریبی ساحلی علاقوں کے اہم مواصلاتی راستوں کو بارودی سرنگوں سے بند کر دیا جائے گا۔ ان کارروائیوں میں ساحل سے پھینکی جانے والی تیرتی ہوئی بارودی سرنگیں بھی شامل ہو سکتی ہیں۔
ایرانی پاسداران انقلاب نے اس سے قبل دھمکی دی تھی کہ اگر ایران کے بجلی کے شعبے پر حملہ کیا گیا تو اس کے جواب میں اسرائیل کے پاور پلانٹس اور خطے میں موجود امریکی اڈوں کو بجلی فراہم کرنے والے مراکز کو نشانہ بنایا جائے گا۔
ایرانی حکام نے ان دعوؤں کی تردید کی ہے جن میں کہا گیا تھا کہ ایران خطے میں پانی صاف کرنے والے پلانٹس کو نشانہ بنانے کا ارادہ رکھتا ہے۔ سرکاری میڈیا پر جاری بیان میں امریکی صدر کے الزامات کو مسترد کرتے ہوئے کہا گیا کہ یہ دعوے جھوٹ پر مبنی ہیں اور ان کا مقصد خطے کے عوام میں تشویش پیدا کرنا ہے۔
