پریڈکشن مارکیٹ پلیٹ فارم پولی مارکیٹ نے پلیٹ فارم پر انسائیڈر ٹریڈنگ کے خاتمے کے لیے اپنے ضوابط میں سخت ترامیم کا اعلان کر دیا ہے۔ یہ اقدام ایسے وقت میں سامنے آیا ہے جب سٹے بازی کی ان مارکیٹس کو شدید تنقید کا سامنا ہے کہ آیا صارفین خفیہ یا نجی معلومات کا غلط استعمال کر کے غیر قانونی منافع کما رہے ہیں۔
نیویارک میں قائم کمپنی نے پیر کے روز اپنے نئے قواعد جاری کیے جن کے تحت چوری شدہ خفیہ معلومات یا غیر قانونی ٹپس کی بنیاد پر کی جانے والی ٹریڈنگ پر مکمل پابندی عائد کر دی گئی ہے۔ نئے اصولوں کے مطابق ایسے افراد کسی بھی ایونٹ پر شرط نہیں لگا سکیں گے جو کسی بااختیار عہدے پر فائز ہوں اور ایونٹ کے نتائج پر اثر انداز ہونے کی صلاحیت رکھتے ہوں۔
مثال کے طور پر کسی پبلک کمپنی کا سی ای او اس مارکیٹ میں ٹریڈ نہیں کر سکے گا جس کا تعلق اس کی اپنی کمپنی کے مالیاتی امور یا کارکردگی سے جڑا ہو۔ یہ ضوابط کمپنی کی امریکی اور غیر ملکی دونوں آپریشنز پر لاگو ہوں گے۔ پولی مارکیٹ کے چیف لیگل آفیسر نیل کمار کا کہنا ہے کہ مارکیٹس شفافیت سے ترقی کرتی ہیں اور ان نئے اصولوں کا مقصد تمام شرکاء کے لیے توقعات کو واضح کرنا ہے۔
کمپنی نے واضح کیا ہے کہ وہ مشکوک سرگرمیوں کی نگرانی کے لیے کثیر الجہتی نظام استعمال کر رہی ہے اور خلاف ورزی کی صورت میں معاملہ قانون نافذ کرنے والے اداروں کے سپرد کیا جا سکتا ہے۔ پولی مارکیٹ کو حالیہ مہینوں میں اس وقت تنقید کا نشانہ بنایا گیا جب سابق وینزویلا کے صدر نکولس مادورو کی گرفتاری اور ایران میں جنگ کے امکانات پر چند صارفین نے انتہائی درست وقت پر بھاری رقوم کمائیں۔
ریاست ایریزونا سے تعلق رکھنے والے سینیٹر روبن گیلیگو نے اس صورتحال کو دن دہاڑے انسائیڈر ٹریڈنگ قرار دیا تھا۔ ماہرین کا ماننا ہے کہ پولی مارکیٹ اور اس کی حریف کمپنی کالشی یہ اقدامات کانگریس کی جانب سے سخت ضوابط کے نفاذ کو روکنے کے لیے کر رہی ہیں۔
ادھر کالشی نے بھی اپنی پالیسیوں کو سخت کرتے ہوئے سیاستدانوں اور کھلاڑیوں کو مخصوص کھیلوں اور سیاسی مارکیٹس میں ٹریڈنگ سے روکنے کے لیے ٹیکنالوجی کا استعمال شروع کر دیا ہے۔ اس کے علاوہ کالشی نے ایک وسل بلوئر فیچر بھی متعارف کروایا ہے تاکہ صارفین قواعد کی خلاف ورزیوں کی نشاندہی کر سکیں۔
کموڈیٹی فیوچرز ٹریڈنگ کمیشن نے بھی رواں ماہ پیش گوئی کرنے والی مارکیٹس کے لیے گائیڈ لائنز جاری کی تھیں تاکہ انسائیڈر ٹریڈنگ اور قیمتوں میں ہیرا پھیری کے خطرات کو کم کیا جا سکے۔
