اسلام آباد میں تعینات سعودی سفیر نواف بن سعید المالکی نے خطے میں امن کے فروغ کے لیے پاکستان کی سفارتی کوششوں اور ذمہ دارانہ کردار کی بھرپور تعریف کی ہے۔ انہوں نے کہا کہ پاکستان علاقائی استحکام اور تنازعات کے پرامن حل کے لیے مسلسل تعمیری کردار ادا کر رہا ہے۔
سعودی سفیر نے ایران کی جانب سے سعودی عرب اور دیگر خلیجی ممالک پر حملوں کو تشویشناک قرار دیتے ہوئے انہیں بلاجواز جارحیت کا نام دیا ہے۔ ان کا کہنا تھا کہ رہائشی علاقوں، ہوائی اڈوں اور شہری تنصیبات کو نشانہ بنانا بین الاقوامی قوانین کی کھلی خلاف ورزی ہے۔
نواف بن سعید المالکی نے مزید کہا کہ یہ حملے نہ صرف خطے بلکہ آبنائے ہرمز کے ذریعے عالمی معاشی مفادات اور توانائی کی ترسیل کے لیے بھی سنگین خطرہ ہیں۔ انہوں نے خبردار کیا کہ یہ صورتحال محض ایک علاقائی مسئلہ نہیں بلکہ انسانی حقوق اور ترقی کے حق سے جڑا ایک عالمی بحران بن چکا ہے۔
سعودی سفیر نے زور دیا کہ خطے میں پائیدار امن کے قیام کے لیے تمام ممالک کو اپنی ذمہ داریاں پوری کرنی ہوں گی۔ انہوں نے بین الاقوامی قوانین کے احترام کو مستقبل کے تحفظ کے لیے ناگزیر قرار دیا اور اس عزم کا اعادہ کیا کہ پاکستان جیسے ممالک کا کردار خطے میں سیکیورٹی اور استحکام کو مستحکم کرنے میں کلیدی حیثیت رکھتا ہے۔
