متحدہ عرب امارات میں شدید بارشوں اور طوفانی ہواؤں کا سلسلہ جاری ہے جس کے باعث ایمریٹس روڈ کے مختلف حصوں میں پانی جمع ہونے سے ٹریفک کی روانی شدید متاثر ہوئی ہے۔ نیشنل سینٹر آف میٹرولوجی کے مطابق جمعہ ستائیس مارچ تک ملک بھر میں گرج چمک کے ساتھ مزید بارشوں کا امکان ہے، جبکہ کچھ علاقوں میں ژالہ باری کی بھی پیشگوئی کی گئی ہے۔
محکمہ موسمیات نے خبردار کیا ہے کہ نچلے دباؤ کا نظام ملک کے مختلف حصوں میں وقفے وقفے سے بارش اور تیز ہواؤں کا سبب بن رہا ہے۔ حکام نے خاص طور پر ابوظہبی سمیت دیگر متاثرہ علاقوں کے رہائشیوں کو احتیاطی تدابیر اختیار کرنے کی ہدایت کی ہے۔ توقع ہے کہ ہفتے کے روز سے موسم میں بہتری آنا شروع ہو جائے گی اور مطلع صاف ہونے کے ساتھ درجہ حرارت میں بھی کمی متوقع ہے۔
راس الخیمہ پولیس نے بتایا ہے کہ وادی البیہ اور وادی قداء میں طغیانی کے باعث پانی ہائی وے پر آ گیا ہے، جس سے سڑکیں سفر کے لیے خطرناک ہو گئی ہیں۔ حکام نے ڈرائیوروں کو ہدایت کی ہے کہ وہ گاڑیوں کی رفتار کم رکھیں، مناسب فاصلہ برقرار رکھیں اور نشیبی علاقوں یا وادیوں کے قریب جانے سے گریز کریں۔
ٹریفک کی روانی کو بحال رکھنے اور شہریوں کی حفاظت کو یقینی بنانے کے لیے پولیس کی پیٹرولنگ ٹیمیں سڑکوں پر موجود ہیں اور عوام کو متبادل راستے اختیار کرنے کا مشورہ دیا گیا ہے۔ گذشتہ شب سے شروع ہونے والی بارشوں، گرج چمک اور آسمانی بجلی گرنے کے واقعات کے بعد متعلقہ اداروں نے الرٹ جاری کر رکھا ہے۔
