اسرائیلی فوج نے بیروت کے جنوبی مضافاتی علاقوں پر دوبارہ شدید بمباری شروع کر دی ہے، جس کا مقصد حزب اللہ کے بنیادی ڈھانچے کو نشانہ بنانا بتایا گیا ہے۔ دوسری جانب تہران کی حمایت یافتہ تنظیم حزب اللہ نے دعویٰ کیا ہے کہ جنوبی لبنان کے دیہاتوں میں ان کے جنگجوؤں کی اسرائیلی فوج کے ساتھ براہ راست جھڑپیں ہوئی ہیں۔
لبنان کی سرکاری خبر رساں ایجنسی کے مطابق بیروت کے علاقے طویط الغدیر پر کیے گئے فضائی حملوں کے نتیجے میں دو افراد ہلاک ہوئے ہیں۔ حملے کے بعد اسرائیلی فوج نے جنوبی مضافات کے متعدد محلوں کے رہائشیوں کو انخلا کی تنبیہ جاری کر دی ہے۔
ملک کے دیگر حصوں میں بھی اسرائیلی جارحیت جاری ہے۔ جنوبی ضلع صیدا کے قصبے سکسکیہ میں حملے کے دوران چار افراد مارے گئے، جبکہ وادی بقاع کے مشرقی علاقے میں ایک حملے میں جڑواں بچوں کی حاملہ خاتون سمیت متعدد شہری جاں بحق ہوئے۔
حزب اللہ کی جانب سے جاری بیان میں کہا گیا ہے کہ ان کے جنگجوؤں نے بیاضہ اور شماع کے دیہاتوں میں اسرائیلی فوج کا آمنے سامنے مقابلہ کیا اور ہلکے و درمیانے ہتھیاروں کا استعمال کیا۔ اسرائیلی فوج نے دعویٰ کیا ہے کہ خیام کے ایک اسکول سے اینٹی ٹینک میزائل سمیت بھاری مقدار میں اسلحہ برآمد کیا گیا ہے۔
اسرائیلی فوج کے ترجمان ایفی ڈیفرن کا کہنا ہے کہ اگر لبنانی حکومت نے حزب اللہ کو غیر مسلح نہ کیا تو اسرائیلی ڈیفنس فورسز خود یہ اقدام اٹھائیں گی۔ اسرائیل کا ہدف دریائے لیتانی تک سیکیورٹی زون قائم کرنا ہے تاکہ شمالی اسرائیل کو حزب اللہ کے حملوں سے محفوظ رکھا جا سکے۔
لبنانی حکام کے مطابق اب تک جاری تنازعے میں 11 سو سے زائد افراد ہلاک اور دس لاکھ سے زیادہ بے گھر ہو چکے ہیں، جن میں سے ایک لاکھ 36 ہزار افراد سرکاری پناہ گاہوں میں مقیم ہیں۔
اقوام متحدہ کے ادارہ برائے مہاجرین کی نمائندہ کرولینا لنڈہولم بلنگ نے خبردار کیا ہے کہ لبنان میں انسانی بحران سنگین صورتحال اختیار کر چکا ہے اور تباہی کا خدشہ حقیقت کا روپ دھار رہا ہے۔
انٹرنیشنل کمیٹی آف ریڈ کراس کے ریجنل ڈائریکٹر نکولس وان آرکس نے لبنانی صدر جوزف عون سے ملاقات کے بعد کہا کہ انسانی صورتحال مسلسل بگڑ رہی ہے اور اس جنگ کی بھاری قیمت عام شہری ادا کر رہے ہیں۔ انہوں نے مطالبہ کیا کہ شہریوں کو ہر حال میں تحفظ فراہم کیا جانا چاہیے۔
