ایچ بی او نے ہیری پوٹر سیریز کے پہلے سیزن کی ریلیز سے قبل ہی دوسرے سیزن پر کام شروع کرنے کی تصدیق کر دی ہے۔ اگرچہ پہلے سیزن کی نمائش میں ابھی کئی ماہ باقی ہیں، تاہم نیٹ ورک نے طویل وقفوں سے بچنے کے لیے یہ حکمت عملی اپنائی ہے۔
دی ٹائمز آف لندن سے گفتگو کرتے ہوئے ایچ بی او کے چیف ایگزیکٹو آفیسر کیسی بلوئس نے بتایا کہ دوسرے سیزن کی اسکرپٹ نویسی کا عمل جاری ہے۔ انہوں نے واضح کیا کہ ہمارا مقصد سیزنز کے درمیان طویل خلا کو ختم کرنا ہے، خاص طور پر اس لیے کہ مرکزی کردار ادا کرنے والے بچے وقت کے ساتھ بڑے ہو رہے ہیں۔
کیسی بلوئس کے مطابق یہ شو انتہائی وسیع اور بڑے پیمانے پر تیار کیا جا رہا ہے، اس لیے ہر سال نیا سیزن پیش کرنا ممکن نہیں ہوگا، لیکن ہم یہ بھی نہیں چاہتے کہ دیگر بڑے اسٹریمنگ شوز کی طرح اس میں برسوں کا وقفہ آئے۔
ہیری پوٹر سیریز کا پہلا سیزن دسمبر 2026 میں نشر کیا جائے گا، جس میں ہیری پوٹر اینڈ دی فلاسفرز اسٹون کی کہانی کو پیش کیا جائے گا۔ مستقبل کے منصوبوں کے تحت ہر سیزن میں کتاب کے ایک حصے کا احاطہ کیا جائے گا۔
پہلے سیزن کی نشریات سے قبل ہی دوسرے سیزن پر کام کا آغاز ایک غیر معمولی اقدام ہے، تاہم ایچ بی او اسے ایک طویل مدتی فرنچائز کے طور پر دیکھ رہا ہے۔ اس طریقہ کار کا مقصد ہاگورٹس کے تعلیمی سالوں کے دوران کہانی کو تسلسل کے ساتھ آگے بڑھانا ہے تاکہ اداکار اپنی عمر کے لحاظ سے کرداروں کے ساتھ ہم آہنگ رہ سکیں۔
