تہران سے موصولہ اطلاعات کے مطابق ایرانی ہلال احمر نے امریکہ اور اسرائیل کے مبینہ فضائی حملوں کے نتیجے میں ہونے والی تباہ کاریوں کی تفصیلات جاری کر دی ہیں۔ رپورٹ میں شہری تنصیبات کو پہنچنے والے شدید نقصانات اور انسانی جانوں کے ضیاع کی ہولناک تصویر پیش کی گئی ہے۔
ایرانی ہلال احمر کے اعداد و شمار کے مطابق ان حملوں کی زد میں ایک لاکھ سے زائد شہری یونٹس آئے ہیں جن میں 83 ہزار سے زائد رہائشی عمارتیں مکمل طور پر تباہ ہو چکی ہیں۔
رپورٹ میں مزید بتایا گیا ہے کہ تعلیمی اور طبی مراکز بھی ان حملوں سے محفوظ نہ رہ سکے۔ حملوں کے دوران 600 اسکولوں کو نشانہ بنایا گیا جبکہ 297 ہسپتال اور دیگر طبی مراکز بھی تباہ ہوئے۔ اس کے علاوہ امدادی کارروائیوں میں استعمال ہونے والی 46 ایمبولینسیں بھی مکمل طور پر تباہ ہو گئی ہیں۔
ایرانی ہلال احمر کی جانب سے جاری کردہ اعداد و شمار کے مطابق ان پے در پے حملوں کے نتیجے میں ہلاک ہونے والے شہریوں کی تعداد 2 ہزار 76 تک پہنچ گئی ہے۔
